నెల్లూరు సిటీ: రూరల్‌ నియోజకవర్గంలోని 17వ డివిజన్‌లో జనసేన, టీడీపీకి చెందిన 150 మంది యువకులు వైఎస్సార్‌సీపీలో చేరారు. నగరంలోని మినీబైపాస్‌ రోడ్డులో ఆ పార్టీ రూరల్‌ అభ్యర్థి ఆదాల ప్రభాకర్‌రెడ్డి కార్యాలయంలో బుధవారం ఈ కార్యక్రమం జరిగింది. పంట్రంగి తేజ, బాలయ్య, సీహెచ్‌ గోపాల్‌, ఊటుకూరు అఖిల్‌, బాలు, హరికృష్ణ తదితరులకు ఆదాల కండువాలు కప్పి సాదరంగా ఆహ్వానించారు. ఈ సందర్భంగా ఆయన మాట్లాడుతూ పార్టీలో చేరిన ప్రతి ఒక్కరికీ సముచిత స్థానం ఉంటుందన్నారు. వైఎస్‌ జగన్‌మోహన్‌రెడ్డిని మరోసారి ముఖ్యమంత్రిని చేయడమే లక్ష్యంగా అందరం కలిసి పనిచేద్దామని పిలుపునిచ్చారు. కార్యక్రమంలో మేయర్‌ స్రవంతి, 17వ డివిజన్‌ కార్పొరేటర్‌ పేనేటి సుధాకర్‌, నాయకులు పాముల రమణయ్య, కఠారి గోపీనాథ్‌ పాశం శ్రీనివాస్‌ తదితరులు పాల్గొన్నారు.

● కోవూరు ఎమ్మెల్యే నల్లపరెడ్డి ప్రసన్న బుచ్చిరెడ్డిపాళెం రూరల్‌: ‘చంద్రబాబు నాయుడు వలంటీర్లపై కక్ష కట్టాడు. వారు సంక్షేమ పథకాలు, వృద్ధులు, దివ్యాంగుల పింఛన్లు ఇవ్వకుండా తన మనుషుల ద్వారా ఈసీకి ఫిర్యాదు చేయించి అడ్డుకున్నాడు’ అని కోవూరు ఎమ్మెల్యే నల్లపరెడ్డి ప్రసన్నకుమార్‌రెడ్డి అన్నారు. బుచ్చిరెడ్డిపాళెం నగర పంచాయతీ పరిధిలోని 200 మంది వలంటీర్లు బుధవారం తమ పోస్టులకు రాజీనామా చేశారు. అనంతరం నెల్లూరులోని ప్రసన్నకుమార్‌రెడ్డి నివాసంలో వైఎస్సార్‌సీపీలో చేరారు. ఎమ్మెల్యే వారికి కండువాలు కప్పి సాదరంగా ఆహ్వానం పలికారు. ఈ సందర్భంగా పార్టీలో చేరిన వారు మాట్లాడుతూ ప్రసన్నకుమార్‌రెడ్డి ప్రజల మనిషి అని చెప్పారు. వచ్చే ఎన్నికల్లో ఆయన విజయం కోసం తమవంతు కృషి చేస్తామని వివరించారు. వైఎస్‌ జగన్‌మోహన్‌రెడ్డిని మరోసారి సీఎంను చేయడమే తమ లక్ష్యమన్నారు. ప్రజా సేవ చేసే వారికే తమ మద్దతు ఉంటుందన్నారు. కార్యక్రమంలో నగర పంచాయతీ చైర్‌పర్సన్‌ మోర్ల సుప్రజ, వైఎస్సార్‌సీపీ పట్టణాధ్యక్షుడు టంగుటూరు మల్లికార్జునరెడ్డి, సచివాలయాల కన్వీనర్‌ మోర్ల మురళి, నాయకుడు కోడూరు మధుసూదన్‌రెడ్డి, కౌన్సిలర్లు, నాయకులు, కార్యకర్తలు పాల్గొన్నారు.

ఎన్నికల సమీపిస్తున్న నేపథ్యంలో నియోజకవర్గాల్లో ప్రచారం జోరుగా సాగుతోంది. అభ్యర్థులకు మద్దతుగా వారి కుటుంబసభ్యులు ప్రతి ఇంటికీ వెళ్లి ఓట్లు అభ్యర్థిస్తున్నారు. వైఎస్సార్‌సీపీ ఉదయగిరి ఎమ్మెల్యే అభ్యర్థి మేకపాటి రాజగోపాల్‌రెడ్డికి మద్దతుగా ఆయన కోడలు నిహారిక బుధవారం పట్టణంలో ప్రచారం నిర్వహించారు. బుచ్చిరెడ్డిపాళెం నగర పంచాయతీ పరిధిలోని ఏడో వార్డులో కోవూరు అభ్యర్థి నల్లపరెడ్డి ప్రసన్నకుమార్‌రెడ్డి తరఫున ఆయన సతీమణి నల్లపరెడ్డి గీతారెడ్డి, కోడలు పూజారెడ్డి ప్రచారం చేశారు. కావలి ఎమ్మెల్యేగా రామిరెడ్డి ప్రతాప్‌కుమార్‌రెడ్డిని మరోసారి గెలిపించాలని కోరుతూ ఆయన కుమారుడు రామిరెడ్డి బాలసాకేత్‌రెడ్డి – మహిమ దంపతులు, కుమార్తె సంహిత – అఖిలేష్‌రెడ్డి దంపతులు 35వ వార్డులో కరపత్రాలు పంపిణీ చేశారు. సర్వేపల్లి ఎమ్మెల్యేగా కాకాణి గోవర్ధన్‌రెడ్డిని భారీ మెజారిటీతో గెలిపించాలని విజ్ఞప్తి చేస్తూ ఆయన కుమార్తె పూజిత ముత్తుకూరు పట్టణం బీసీ కాలనీ, ఎమ్మార్వో గిరిజన కాలనీల్లో ఇంటింటి ప్రచారం నిర్వహించారు. వైఎస్సార్‌సీపీ ప్రభుత్వంలో జరిగిన అభివృద్ధి, అమలు చేసిన సంక్షేమ పథకాలను వివరించారు. వైఎస్‌ జగన్‌మోహన్‌రెడ్డిని మరోసారి సీఎంను చేయాలని కోరారు. – ఉదయగిరి/బుచ్చిరెడ్డిపాళెం రూరల్‌/కావలి/ముత్తుకూరు

● మాజీ ఎంపీ మేకపాటి రాజమోహన్‌రెడ్డి మర్రిపాడు: ‘ఆత్మకూరు నియోజకవర్గాన్ని అన్ని విధాలా అభివృద్ధి చేస్తాం. సంక్షేమ ప్రభుత్వం కొనసాగేందుకు అందరూ సహకరించాలి’ అని నెల్లూరు మాజీ ఎంపీ మేకపాటి రాజమోహన్‌రెడ్డి కోరారు. మండలంలోని చిన్న అల్లంపాడు, పెద్ద అల్లంపాడు గ్రామాల్లో బుధవారం రచ్చబండ కార్యక్రమాన్ని నిర్వహించారు. ఈ సందర్భంగా ఆయన మాట్లాడుతూ టీడీపీ ఎంపీ అభ్యర్థి వేమిరెడ్డి ప్రభాకర్‌రెడ్డి, ఆత్మకూరు ఎమ్మెల్యే అభ్యర్థి ఆనం రామనారాయణరెడ్డి పలువురికి ప్యాకేజీలు ఇచ్చి ప్రలోభాలకు గురిచేశారన్నారు. దీని వల్ల వైఎస్సార్‌సీపీకి మేలు చేకూరిందన్నారు. అనేకమంది విక్రమ్‌రెడ్డి వెంట నడిచేందుకు సిద్ధమయ్యారన్నారు. ఏఎస్‌పేటలో జరిగిన కార్యక్రమంలో ఆనం చేసిన వ్యాఖ్యలపై సవాల్‌ చేస్తున్నామన్నారు. వేమిరెడ్డి ఎంపీ అభ్యర్థిగా వచ్చిన తర్వాతే ఆత్మకూరులో రామనారాయణరెడ్డి తిరుగుతున్నారని చెప్పారు. వెంకటగిరికి వెళ్లిపోయాడని, వేమిరెడ్డి అందజేసిన ప్యాకేజీతో ఆనం ఇక్కడ రాజకీయాలు చేస్తున్నాడన్నారు. ఆయనకు త్వరలోనే సరైన సమాధానం చెబుతామన్నారు. అలాంటి వారిని ప్రజలు నమ్మరని, వైఎస్సార్‌సీపీని ప్రజలంతా మళ్లీ గెలిపించుకోవాలని కోరారు. కార్యక్రమంలో వైఎస్సార్‌సీపీ మండల కన్వీనర్‌ బొర్రా సుబ్బిరెడ్డి, మాజీ కన్వీనర్‌ గంగవరపు శ్రీనివాసులునాయుడు, దశరథరామిరెడ్డి, గువ్వల వెంగళరెడ్డి, చెన్ను వెంకటేశ్వరరెడ్డి, మౌలాలి, హజరత్‌రెడ్డి, దుగ్గిరెడ్డి కృష్ణప్రసాద్‌రెడ్డి, రేవూ రు వేణుగోపాల్‌రెడ్డి తదితరులు పాల్గొన్నారు. ముమ్మరంగా తనిఖీలు నెల్లూకరు(క్రైమ్‌): సార్వత్రిక ఎన్నికల నేపథ్యంలో మద్యం, నగదు అక్రమ రవాణా కట్టడికి పోలీసు, సెబ్‌ అధికారులు తనిఖీలు ముమ్మరం చేశారు. మంగళ, బుధవారాల్లో మనుబోలు పోలీసుస్టేషన్‌ పరిధిలో ఎలాంటి పత్రాలు లేకుండా అక్రమంగా తరలిస్తున్న వివిధ వస్తువులను స్వాధీనం చేసుకున్నారు. పోలీసులు వెంకటాచలసత్రం పరిధిలో 19, ఇందుకూరుపేటలో 10, సైదాపురంలో ఆరు మద్యం బాటిళ్లు, సెబ్‌ అధికారులు 195 మద్యం బాటిళ్లను స్వాధీనం చేసుకున్నారు. కండలేరులో 7.636 టీఎంసీలు రాపూరు: కండలేరు జలాశయంలో బుధవారం నాటికి 7.636 టీఎంసీలు నిల్వ ఉన్నట్లు జలాశయం ఈఈ విజయకుమార్‌రెడ్డి తెలిపారు. హెడ్‌రెగ్యులేటర్‌ నుంచి సత్యసాయిగంగకు 250 క్యూసెక్కులు, పిన్నేరువాగుకు 5, లోలెవల్‌ కాలువకు 25 క్యూసెక్కుల వంతున నీటిని విడుదల చేస్తున్నట్లు పేర్కొన్నారు.

పొదలకూరు: ‘నేను స్థానికుడిని. మండలంలో ప్రతి గ్రామం గురించి తెలుసు. మీకేం కావాలో ఐడియా ఉంది. టీడీపీ అభ్యర్థి సోమిరెడ్డి చంద్రమోహన్‌రెడ్డి అలియాస్‌ అల్లీపురంరెడ్డి అవకాశం కోసం వస్తున్నాడు. ఆయన్ను నమ్మొద్దు. ఎన్నికలయ్యాక కనిపించడు’ అని రాష్ట్ర వ్యవసాయ శాఖ మంత్రి కాకాణి గోవర్ధన్‌రెడ్డి అన్నారు. మండలంలోని ఆల్తుర్తి, ఆర్‌వైపాళెం, అంకుపల్లి, వెంకటాపురం, పర్వతాపురం, పులికల్లు, వావింటపర్తి, ఊసపల్లి గ్రామాల్లో బుధవారం మంత్రి ఎన్నికల ప్రచారాన్ని నిర్వహించారు. ఈ సందర్భంగా మాట్లాడుతూ వైఎస్‌ జగన్‌మోహన్‌రెడ్డి ఇచ్చిన హామీలను నెరవేర్చడంతోపాటు ఇవ్వని హామీలను కూడా అమలు చేసినట్లు తెలిపారు. 2014 ఎన్నికల్లో చంద్రబాబు నాయుడు రైతులు, పొదుపు మహిళలకు రుణమాఫీ చేస్తానని నమ్మించి అధికారంలోకి వచ్చాడన్నారు. కానీ వారిని మోసం చేసినట్లు చెప్పారు. వైఎస్సార్‌సీపీ ప్రభుత్వంలో గ్రామాలు అభివృద్ధి చెందాయన్నారు. సచివాలయాలు, ఆర్బీకే, విలేజ్‌ హెల్త్‌ క్లినిక్‌ భవనాల నిర్మాణం జరిగిందన్నారు. ప్రతి వీధిలో సిమెంటురోడ్లు, సైడ్‌ డ్రెయిన్లు నిర్మించామన్నారు. అధికారం చేజిక్కించుకునేందుకు చంద్రబాబు కూటమిని ఏర్పాటు చేసి వస్తున్నాడని, ఆయన్ను నమ్మొద్దని సూచించారు. ఓటెందుకు వేయాలి సోమిరెడ్డి.. ఏం మేలు చేశావని ప్రజలు నీకు ఓటేయాలని సోమిరెడ్డిని మంత్రి ప్రశ్నించారు. ఆయన వ్యవసాయ శాఖ మంత్రిగా ఉన్నప్పుడు ఒక్క గ్రామాన్ని కూడా అభివృద్ధి చేయలేదన్నారు. ఐదేళ్లు ప్రజలకు అందుబాటులో లేకుండాపోయి ఇప్పుడొచ్చి ఓట్లు అడుగుతున్నాడన్నారు. రూ.కోట్లు వెచ్చించి ప్రతి గ్రామంలో మట్టిరోడ్డు లేకుండా చేశానని, మురుగునీరు బయటకు వెళ్లేందుకు డ్రెయినేజీ వ్యవస్థను ఏర్పాటు చేయించినట్లు కాకాణి చెప్పారు. పేదలకు భూముల పంపిణీ, చుక్కల భూముల సమస్యకు శాశ్వత పరిష్కారం చూపానన్నారు. మూడో పర్యాయం అవకాశం ఇవ్వాలని కోరారు. అభివృద్ధి, సంక్షేమ పథకాలు ఎవరి హయాంలో అందాయో గుర్తించి ఓటేయాల్సిందిగా విజ్ఞప్తి చేశారు. మంత్రి వెంట చిల్లకూరు వెంకురెడ్డి, పి.బాబిరెడ్డి, బూసుపల్లి చిన్నపరెడ్డి, కె.రామిరెడ్డి, శ్రీహరి, చంద్రశేఖర్‌, వై.పెంచలరెడ్డి, టి.నారాయణరెడ్డి తదితరులు ఉన్నారు. రాష్ట్ర వ్యవసాయ శాఖ మంత్రి కాకాణి గోవర్ధన్‌రెడ్డి

● అడిషనల్‌ డీఎంహెచ్‌ఓ ఖాదర్‌వలి పొదలకూరు: క్షయ వ్యాధిగ్రస్తులను గుర్తించాలని అడిషనల్‌ డీఎంహెచ్‌ఓ డాక్టర్‌ ఖాదర్‌వలి సిబ్బందిని ఆదేశించారు. ఆయన గురువారం పొదలకూరులోని సీహెచ్‌సీని, మహ్మదాపురం పీహెచ్‌సీని తనిఖీ చేశారు. ఈ సందర్భంగా ఆయన మాట్లాడుతూ మండలంలో ఉన్న 22 హెల్త్‌ వెల్నెస్‌ సెంటర్లలో సిబ్బంది అందరూ క్షయ వ్యాధిగ్రస్తుల గుర్తింపుపై ప్రత్యేక శ్రద్ధ తీసుకోవాలని సూచించారు. రెండు వారాలకు మించి దగ్గు వస్తుంటే వెంటనే వారికి క్షయ పరీక్షలు నిర్వహించాలన్నారు. పెద్దలకు టీబీ వ్యాధి రాకుండా బీసీజీ వ్యాక్సిన్‌ ఈ నెల 16వ తేదీ నుంచి వేయనున్నట్లు తెలిపారు. గ్రామాల్లో కుష్టువ్యాధిపై ఇంటింటి సర్వే నిర్వహించాలని తెలిపారు. విరువూరు, తాటిపర్తి హెల్త్‌ వెల్నెస్‌ సెంటర్లను డాక్టర్‌ ఖాదర్‌వలి ఆకస్మికంగా తనిఖీ చేశారు. వైద్యులు, సిబ్బంది సమయపాలన పాటించాలని, రోగులకు సకాలంలో వైద్యసేవలు అందించాలని సూచించారు. ఆయన వెంట పీహెచ్‌సీ వైద్యాధికారి నరసింహారావు, డాక్టర్‌ స్రవంతి, డాక్టర్‌ ప్రసాద్‌, డాక్టర్‌ పద్మావతి, ఆరోగ్య పర్యవేక్షకులు శ్రీనివాసులు, శబరీనాథ్‌ తదితరులు ఉన్నారు.

● మేకపాటి రాజగోపాల్‌రెడ్డి కొండాపురం: సీఎం వైఎస్‌ జగన్‌మోహన్‌రెడ్డి ప్రజా సంక్షేమమే ధ్యేయంగా సంక్షేమ పథకాలు అమలు చేశారని, ఈ నెల 13న జరగనున్న ఎన్నికల్లో ఫ్యాన్‌ గుర్తుకు ఓటు వేసి వైఎస్సార్‌సీపీ అభ్యర్థులను గెలిపించాలని ఆ పార్టీ ఉదయగిరి ఎమ్మెల్యే అభ్యర్థి మేకపాటి రాజగోపాల్‌రెడ్డి కోరారు. గురువారం కొండాపురం మండలంలోని గరిమెనపెంట, చింతలదేవి, ఉప్పలూరు, గొట్టిగుండాల పంచాయతీల్లో ఆయన ఎన్నికల ప్రచారం నిర్వహించారు. ఈ సందర్భంగా ఆయన మాట్లాడుతూ పాదయాత్ర ప్రజల కష్టాలను స్వయంగా చూసిన వైఎస్‌ జగన్‌మోహన్‌రెడ్డి అధికారంలోకి వచ్చాక నవరత్నాల పథకాలను తీసుకొచ్చి ప్రతి పేదవాడికి ఈ సంక్షేమ పథకాలు అందేలా చర్యలు తీసుకున్నారని తెలిపారు. సార్వత్రిక ఎన్నికల నేపథ్యంలో మరలా నూతనంగా విడుదల చేసిన మేనిఫెస్టోలోనూ నవరత్నాల పథకాలను కొనసాగిస్తూ లబ్ధిదారులకు మరింత ప్రయోజనం చేకూర్చేలా రూపకల్పన చేశారని తెలిపారు. మళ్లీ వైఎస్సార్‌సీపీ ప్రభుత్వాన్ని అధికారంలోకి తెచ్చుకుంటే పేద, బడుగు, బలహీనవర్గాలకు ప్రతి పథకం ఇంటికే చేరుతుందన్నారు. చంద్రబాబు గతంలో 600 హామీలిచ్చి ఒక్క హామీని కూడా సక్రమంగా అమలు చేయలేదన్నారు. మరలా ఇప్పుడు సూపర్‌ సిక్స్‌ అంటూ ప్రజలను మోసం చేసేందుకు జనసేన, బీజేపీలతో కలిసి అబద్ధాలు ఆడుతున్నారన్నారు. ప్రజలు దీనిని గమనించాలని కోరారు. వైఎస్సార్‌సీపీ నెల్లూరు ఎంపీ అభ్యర్థి వి.విజయసాయిరెడ్డి ముఖ్యమంత్రి వైఎస్‌ జగన్‌మోహన్‌రెడ్డికి అత్యంత సన్నిహితుడని, ఎంపీగా విజయసాయిరెడ్డిని, ఉదయగిరి ఎమ్మెల్యేగా తనను గెలిపించుకుంటే విజయసాయిరెడ్డి ద్వారా ఉదయగిరిని అభివృద్ధి చేసుకునేందుకు అవకాశం లభిస్తుందని తెలిపారు. కార్యక్రమంలో వైఎస్సార్‌సీపీ మండల కన్వీనర్‌ చిమిలి రవీంద్ర, గుడవళ్లూరు సొసైటీ అధ్యక్షుడు కర్తం శ్రీనివాసులురెడ్డి, జేసీఎస్‌ కన్వీనర్‌ యారవ నరసింహరావు, ఎంపీటీసీ సభ్యులు గోపిదేశి యానాదమ్మ, మేకల కొండలరావు, వేమిరెడ్డి మల్లికార్జున్‌రెడ్డి, గరిమెనపెంట సర్పంచ్‌ గున్నా విజయమ్మ, నాయకులు యారవ వెంకటేశ్వర్లు, ముసలారెడ్డి, వీరెళ్ల చంద్రయ్య, తిమ్మారెడ్డి రమణారెడ్డి, శ్రీనివాసులు, మన్నం వెంకటసుబ్బయ్య, ఎడ్లపల్లి వెంకటరమణయ్య, చిమిలి రవీంద్ర తదితరులు పాల్గొన్నారు.

నెల్లూరు(పొగతోట): వైఎస్‌ జగన్‌మోహన్‌రెడ్డి ప్రభుత్వం అవ్వాతాతలు, దివ్యాంగులు, వితంతువులు తదితర పింఛన్‌ లబ్ధిదారులకు ప్రతి నెలా ఒకటో తేదీన పింఛన్‌ నగదును వలంటీర్ల ద్వారా వారి ఇంటి వద్దే అందిస్తుండగా.. చంద్రబాబు, ఆయన అనుచరగణం అగచాట్లు తెచ్చిపెట్టింది. వలంటీర్ల సేవలను అడ్డుకుని పింఛన్‌ నగదు లబ్ధిదారులకు ఇంటి వద్దే అందకుండా చేయడంతో వారు నానా తిప్పలు పడుతున్నారు. పింఛన్‌ నగదు కోసం తీవ్రమైన ఎండలో బ్యాంకుల వద్ద అవ్వాతాతలు పడిగాపులు కాయాల్సి వస్తోంది. నగదు డ్రా చేసుకోవడానికి గంటల తరబడి క్యూలో ఎదురుచూడాల్సి వచ్చింది. గ్రామీణ ప్రాంతాల నుంచి మండల కేంద్రంలో ఉన్న బ్యాంకుల వద్దకు రావడానికి అవ్వాతాతలు నానా ఇబ్బందులు పడ్డారు. చంద్రబాబు పాలనలో పింఛన్‌ నగదు కోసం పడిన అవస్థలు గుర్తుకువచ్చాయని లబ్ధిదారులు ఆవేదన వ్యక్తం చేశారు. బ్యాంకుల్లో జిల్లా యంత్రాంగం లబ్ధిదారుల కోసం ఏర్పాట్లు చేసినప్పటికీ ప్రయోజనం లేకుండాపోయింది. వలంటీర్ల ద్వారా నేరుగా.. జిల్లావ్యాప్తంగా 3.15 లక్షల మంది పింఛన్‌ లబ్ధిదారులు ఉండగా వైఎస్‌ జగన్‌మోహన్‌రెడ్డి ప్రభుత్వం వారికి ప్రతి నెలా ఒకటో తేదీ నుంచి 5వ తేదీ వరకు రూ.94.38 కోట్ల నగదును వలంటీర్ల ద్వారా నేరుగా లబ్ధిదారుల వద్దకే వెళ్లి పంపిణీ చేసేది. వలంటీర్లు పింఛన్‌ నగదు పంపిణీతోపాటు ప్రభుత్వ సంక్షేమ పథకాలను అందించడంలో కీలకంగా వ్యవహరించేవారు. ఇలా వలంటీర్లు ప్రజలకు దగ్గర కావడంతో వారిని కుటుంబసభ్యులుగా భావించేవారు. గత నాలుగున్నరేళ్లుగా ఇలా ఇంటింటికీ వెళ్లి ప్రజలకు ప్రభుత్వ సేవలను అందించేవారు. ఎన్నికల సమయంలో కుట్రలు చంద్రబాబు ముఖ్యమంత్రిగా ఉన్న సమయంలో పింఛన్‌ లబ్ధిదారులు ప్రతి నెలా ఆ నగదు కోసం ఎదురుచూడాల్సివచ్చేది. ప్రతి నెల 5వ తేదీ తరువాత పంచాయతీ కార్యాలయంలో పింఛన్‌ నగదు ఇచ్చేవారు. పింఛన్‌ డబ్బులు ఇచ్చే అధికారి వచ్చే వరకు అవ్వాతాతలు, దివ్యాంగులు, వితంతువులు క్యూలో నిలబడి పడిగాపులు కాయాల్సివచ్చేది. అధికారి వచ్చి క్యూలో ఉన్న కొంతమందికి మాత్రమే నగదు పంపిణీ చేసి మిగిలిన వారిని మరుసటి రోజు వచ్చి తీసుకోవాలని చెప్పేవారు. ఇలా చంద్రబాబు పాలనలో ఎన్నో అవస్థలు పడిన పింఛన్‌దారులకు వైఎస్‌ జగన్‌మోహన్‌రెడ్డి ప్రభుత్వం ఇంటి వద్దే పింఛన్‌ నగదు అందించేలా వలంటీర్లను నియమించి వారి కష్టాలను తీర్చింది. వలంటీర్లు ప్రజలకు అందిస్తున్న సేవలను చూసి ఓర్వలేని చంద్రబాబు, ఆయన అనుచరగణం వారిపై పగబట్టి వారి సేవలను అడ్డుకునేలా ఎన్నికల సమయంలో కుట్రలు పన్నారు. వలంటీర్లు ఇలా ప్రజలకు సేవలు అందిస్తే టీడీపీకి నష్టం జరుగుతుందని కుతంత్రాలు చేశారు. చంద్రబాబుకు సంబంధించిన వ్యక్తులతో ఎన్నికల కమిషన్‌కు ఫిర్యాదులు చేయించారు. కోర్టును ఆశ్రయించారు. దీంతో వలంటీర్లు ఇంటింటికీ వెళ్లి లబ్ధిదారులకు పింఛన్ల నగదు పంపిణీ చేయకూడదని ఎన్నికల కమిషన్‌ ఆదేశాలు జారీ చేసింది. ఈ విషయంపై పింఛన్‌ లబ్ధిదారులైన అవ్వాతాతలు, దివ్యాంగులు, వితంతువులు తదితరుల నుంచి తీవ్ర వ్యతిరేకత రావడంతో చంద్రబాబు బ్యాచ్‌ కంగుతింది. తమ ఉసురు చంద్రబాబు, ఆయన అనుచరగణానికి తప్పకుండా తగులుతుందని అవ్వాతాతలు, దివ్యాంగులు, వితంతువులు ఆవేదన వ్యక్తం చేస్తున్నారు.

సాక్షి ప్రతినిధి, నెల్లూరు: కోవూరు నియోజకవర్గంలో టీడీపీ గ్రాఫ్‌ పడిపోతుండడంతో ఆ పార్టీ నేతలు అలజడి సృష్టిస్తున్నారు. ప్రశాంతమైన గ్రామాల్లో రాజకీయ కక్షలకు ఆజ్యం పోస్తున్నారు. ఎన్నికల వేళ టీడీపీ కోవూరు ఎమ్మెల్యే అభ్యర్థి వేమిరెడ్డి ప్రశాంతిరెడ్డి నోట్ల కట్టలతో వలస నేతలను సంతలో సరుకులా కొనుగోలు చేసినా క్షేత్రస్థాయిలో ఓటర్లు మాత్రం అమ్ముడుపోయిన నేతలను ఛీదరించుకుంటూ వైఎస్సార్‌ కాంగ్రెస్‌ పార్టీకే జై కొడుతున్నారు. దీంతో ఓటమి భయం పట్టుకున్న పచ్చనేతలు గ్రామాల్లో అలజడి సృష్టించే ప్రయత్నాలు చేస్తున్నారు. తాజాగా విడవలూరు మండలం పార్లపల్లిలో టీడీపీ నేతలు ముస్లింల మనోభావాలను దెబ్బతీశారు. వారు పవిత్రంగా భావించే మసీదును కూల్చివేసిన ఘటన ఆలస్యంగా వెలుగులోకి వచ్చింది. పార్లపల్లిలో ముస్లింలకు ప్రార్థనా మందిరానికి (మసీదుకు) శాశ్వత భవనం లేక స్థానికంగానే పాకలో ప్రార్థనలు చేసుకుంటున్నారు. ఎన్నికల నోటిఫికేషన్‌ రాకముందు నుంచే శాశ్వత భవనం ఏర్పాటు చేసుకుందామని భావించి స్థానికంగా అందరికీ ఆమోదయోగ్యమైన స్థలంలో మసీదు నిర్మాణానికి పూనుకున్నారు. ముస్లింలతోపాటు కొందరు దాతల సాయంతో నిర్మాణం ప్రారంభించుకున్నారు. ఎన్నికల వేళ ఆ గ్రామంలో ముస్లింలందరూ వైఎస్సార్‌సీపీకి సానుభూతిపరులుగా ఉండడంతో జీర్ణించుకోలేని స్థానిక టీడీపీ నేతలు మసీదు నిర్మాణాన్ని అడ్డుకున్నారు. ప్రభుత్వ స్థలంలో నిర్మించుకుంటున్నారని సాకు చూపి అధికారులను పంపి నిర్మాణాన్ని నిలిపివేసే ప్రయత్నాలు చేశారు. కానీ ముస్లింలందరూ ఏకం కావడంతో అధికారులు మిన్నకుండిపోయారు. టీడీపీ నేతలు పన్నిన కుట్రలు ఫలించకపోవడంతో రాత్రికి రాత్రే నూతన నిర్మాణ భవనాన్ని కూల్చివేశారు. ఎవరో గుర్తుతెలియని దుండగలు చేసినట్లుగా కట్టుకథ అల్లారు. ఈ ఘటనకు సంబంధించి తమ మనోభావాలను దెబ్బతీసిన టీడీపీ నేతలపై ముస్లింలు ఆగ్రహం వ్యక్తం చేసి విడవలూరు పోలీసులకు ఫిర్యాదు చేశారు. స్థానికంగా ఉన్న ఓ టీడీపీ నేతపై అనుమానం ఉందని పోలీసులకు ఇచ్చిన ఫిర్యాదులో పేర్కొన్నారు. రంగంలోకి దిగిన వేమిరెడ్డి పార్లపల్లిలో జరిగిన ఘటన వెలుగులోకి వస్తే జిల్లాలో పెద్ద అలజడి రేగుతుందని భావించిన వేమిరెడ్డి ప్రశాంతిరెడ్డి తన అనుచరుల ద్వారా ముస్లింలతో రాయబారాలు నడిపినట్లు తెలిసింది. ఎన్నికల తర్వాత మసీదు నిర్మాణం చేయిస్తానంటూ వారిని ఒప్పించేందుకు విశ్వప్రయత్నాలు చేశారు. పోలీసులకు ఫిర్యాదు చేసినా కేసు నమోదు చేయకపోవడమే ఇందుకు నిదర్శనం. కోవూరులో రెచ్చిపోతున్న పచ్చ మూకలు విడవలూరు మండలం పార్లపల్లిలో ముస్లింల మనోభావాలపై దాడి నూతనంగా నిర్మించుకుంటున్న మసీదును కూల్చేసిన దుండగులు టీడీపీ నేతల తీరుపై ఆగ్రహం వ్యక్తం చేసిన మైనారిటీలు

● రాజ్యసభ సభ్యుడు బీద మస్తాన్‌రావు కావలి: ప్రతి ఇంటికి సంక్షేమం అందాలంటే అది జగనన్నతోనే సాధ్యమని, వైఎస్‌ జగన్‌మోహన్‌రెడ్డి ప్రభుత్వం మళ్లీ అధికారంలోకి వచ్చేలా ప్రజలంతా ఫ్యాన్‌ గుర్తుకు ఓటు వేయాలని రాజ్యసభ సభ్యుడు బీద మస్తాన్‌రావు పిలుపునిచ్చారు. కావలి పట్టణంలోని మద్దురుపాడు ప్రాంతంలో స్థానిక ఎమ్మెల్యే రామిరెడ్డి ప్రతాప్‌కుమార్‌రెడ్డితో కలిసి గురువారం ఆయన ఎన్నికల ప్రచారం నిర్వహించారు. ఈ సందర్భంగా బీద మస్తాన్‌రావు మాట్లాడుతూ కులమతాలు, రాజకీయ పార్టీలకు అతీతంగా ఇంటి వద్దకే సంక్షేమ పథకాలు అందించిన ఘనత వైఎస్‌ జగన్‌మోహన్‌రెడ్డి ప్రభుత్వానికే దక్కిందన్నారు. మళ్లీ అలాంటి పరిస్థితే ఉండాలంటే ఈ నెల 13న జరిగే ఎన్నికల్లో ఫ్యాన్‌ గుర్తుకు ఓటు వేసి వైఎస్సార్‌సీపీ అభ్యర్థులను గెలిపించాలని కోరారు. గత టీడీపీ ప్రభుత్వంలో జన్మభూమి కమిటీల దయాదాక్షిణ్యాలపై సంక్షేమ పథకాలు అందే పరిస్థితి ఉండేదని, వైఎస్సార్‌సీపీ ప్రభుత్వం అధికారంలోకి వచ్చాక సచివాలయ, వలంటీర్‌ వ్యవస్థలను తీసుకువచ్చి ప్రజల ఇంటి ముంగిటకే సంక్షేమ పథకాలు అందించినట్లు తెలిపారు. వైఎస్సార్‌సీపీ ప్రభుత్వంలో కావలి నియోజకవర్గంలో గతంలో ఎన్నడూ లేనివిధంగా అభివృద్ధి జరిగిందని తెలిపారు. మరోసారి వైఎస్సార్‌సీపీని గెలిపిస్తే కావలి నియోజకవర్గం మరింత అభివృద్ధి పథంలో ముందుకుసాగుతుందని తెలిపారు. నెల్లూరు ఎంపీగా వి.విజయసాయిరెడ్డిని, కావలి ఎమ్మెల్యేగా రామిరెడ్డి ప్రతాప్‌కుమార్‌రెడ్డిని అత్యధిక మెజారిటీతో గెలిపించాలని కోరారు. వైఎస్సార్‌సీపీ నెల్లూరు పార్లమెంట్‌ పరిశీలకుడు, మాజీ ఎమ్మెల్యే కాటంరెడ్డి విష్ణువర్ధన్‌రెడ్డి మాట్లాడుతూ వైఎస్సార్‌సీపీ ప్రభుత్వం పరిపాలనలో విప్లవాత్మక మార్పులు తీసుకువచ్చి సంక్షేమ, అభివృద్ధి కార్యక్రమాలను అమలు చేసిందని తెలిపారు. ప్రజలు వేసే ఓటు రానున్న ఐదేళ్లలో వారి భవిష్యత్‌ను నిర్ణయిస్తుందని తెలిపారు.