భద్రాద్రి: చదువు మాన్పించి పెళ్లి చేశారనే మనస్తాపంతో నవ వధువు బలవన్మరణానికి పాల్పడిన విషాదఘటన భద్రాద్రి కొత్తగూడెం జిల్లా చండ్రుగొండ మండలం మంగయ్యబంజర్‌లో సోమవారం చోటుచేసుకుంది. పోలీసులు, కుటుంబసభ్యుల కథనం ప్రకారం.. మంగయ్యబంజర్‌ గ్రామానికి చెందిన భూక్యా దేవకి(23) ఈ ఏడాది కొత్తగూడెంలోని సింగరేణి మహిళా కళాశాలలో డిగ్రీ పూర్తి చేసింది. పై చదువులకు వెళ్తానని పట్టుబట్టినా.. తల్లి ఆరోగ్యం బాగుండడం లేదనే సాకుతో కుటుంబసభ్యులు వివాహానికి ఒప్పించారు.  ఇదే మండలంలోని దుబ్బతండాకు చెందిన గుగులోత్‌ బాలరాజుతో మార్చి 28న దేవకికి వివాహం జరిపించారు. కాగా, 16 రోజుల పండుగ నిమిత్తం నూతన వధూవరులను ఈనెల 12న మంగయ్యబంజర్‌ తీసుకొచ్చారు. 13వ తేదీ అర్ధరాత్రి అందరూ నిద్రిస్తున్న సమయంలో దేవకి పురుగుల మందు తాగింది. గమనించిన కుటుంబసభ్యులు ఆమెను మొదట జూలూరుపాడు ఆస్పత్రికి, అక్కడి నుంచి కొత్తగూడెంకు తరలించారు. ఆ తర్వాత మెరుగైన చికిత్స నిమిత్తం ఖమ్మంలోని ఓ ప్రైవేటు ఆస్పత్రికి తరలించగా, సోమవారం తెల్లవారుజామున తుదిశ్వాస విడిచింది. తల్లి భూక్యా పద్మ ఫిర్యాదు మేరకు చండ్రుగొండ ఎస్సై మాచినేని రవి కేసు నమోదు చేశారు.

వారిద్దరూ అన్నదమ్ములు. తల్లిదండ్రుల నుంచి వచ్చిన ఆస్తి పంపకంలో పంతాలకు పోయారు. పేగు బంధాన్ని కాదని ఘర్షణకు దిగారు. పెద్ద మనసు చేసుకోవాల్సిన అన్న బాధ్యత మరచి తమ్ముడిపై దాడికి దిగాడు. కోపంలో నాటు తుపాకీ చేతబట్టి సోదరుడిపై కాల్పులకు తెగబడ్డాడు. తీవ్రగాయాలతో తమ్ముడు ప్రాణాపాయ స్థితిలో ఉన్నాడు. గుర్రంకొండ : ఆస్తి వివాదం పెద్దది కావడంతో తమ్ముడిని అన్న నాటు తుపాకీతో కాల్చిన సంఘటన మండలంలోని టి.పసలవాండ్లపల్లె పంచాయతీ చాగలపల్లె దళితవాడలో జరిగింది. గ్రామానికి చెందిన బాలపోగు జయప్ప, బాలపోగు విశ్వనాథ్‌లు అన్నదమ్ములు. వీరికి గ్రామానికి సమీపంలోనే తల్లిదండ్రుల నుంచి సంక్రమించిన పొలం ఉంది. గత కొంత కాలంగా ఆస్తి పంపకాలు, ఇతరత్రా విషయాలపై తరచూ అన్నదమ్ములు గొడవపడేవారు. ఇటీవల విశ్వనాథ్‌ ఇంటి ముందు ఉన్న టెంకాయ చెట్టును జయప్ప నరికి వేశాడు. ఈవిషయమై మంగళవారం రాత్రి విశ్వనాథ్‌ అన్న జయప్పను ప్రశ్నించాడు. తన ఇంటి ముందున్న చెట్టును ఎందుకు నరికి వేశావంటూ నిలదీయంతో వివాదం రాజుకొంది. పాత కక్షలు మనసులో పెట్టుకొని జయప్ప తమ్ముడు విశ్వనాథ్‌తో ఘర్షణకు దిగాడు. వివాదం పెద్దది కావడంతో అడవి జంతువులను వేటాడడం కోసం తన వద్ద దాచి ఉంచిన నాటు తుపాకీని తీసుకొచ్చి జయప్ప తన తమ్ముడు విశ్వనాథ్‌పై కాల్పులు జరిపాడు. ఈకాల్పుల్లో విశ్వనాథ్‌కు ఛాతీ, తొడలపై రక్తగాయాలు అయ్యాయి. గాయపడిన విశ్వనాథ్‌ను కుటుంబసభ్యులు మదనపల్లె ప్రభుత్వాస్పత్రికి తరలించారు. పరిస్థితి విషమించడంతో మెరుగైన వైద్యసేవల కోసం తిరుపతి రుయా ఆస్పత్రికి తరలించారు. ఈ సంఘటనపై బుధవారం కేసు నమోదు చేసి దర్యాప్తు చేస్తున్నట్లు ఎస్‌ఐ నాగార్జున రెడ్డి తెలిపారు.

కాలం పగబట్టింది రా కన్నా... ఇంత అన్యాయం జరుగుతుందనుకోలేదురా బిడ్డ క్షమించు రా నాన్నా..! ఏ లోకంలో ఉన్నా.. ఈ అమ్మ ప్రాణం నీకోసమే.. మంచిర్యాల: మండలంలోని కోమటిచేనుకు చెందిన బెడ్డల మౌనిక (28) విద్యుత్‌షాక్‌తో బుధవారం మృతి చెందినట్లు ఎస్సై ప్రవీణ్‌కుమార్‌ తెలిపారు. వాటర్‌ట్యాంక్‌లో నీటిని పరిశీలించేందుకు ఇంటిపైకి ఎక్కింది. అయితే తెగిపోయిన విద్యుత్‌ వైరు ఇనుప రేకులకు తాకింది. వాటిని తాకిన మౌనికకు విద్యుత్‌షాక్‌ తగిలి అక్కడికక్కడే మృతి చెందినట్లు అనుమానం వ్యక్తం చేస్తున్నారు. మృతురాలి తండ్రి జాడి రామకృష్ణ ఫిర్యాదు మేరకు కేసు నమోదు చేసి దర్యాప్తు జరుపుతున్నట్లు ఎస్సై తెలిపారు.   ఇంటికొచ్చిన కొద్ది గంటల్లోనే.. మౌనిక తల్లి రెండేళ్ల కిందట మృతి చెందింది. ఇంట్లో పనులు చేసేందుకు మూడు రోజుల కిందట ముత్యంపల్లిలోని తల్లిగారి నివాసానికి మౌనిక వెళ్లింది. బుధవారం శ్రీరామ నవమి కావడంతో ఉదయాన్నే అత్తగారి ఇంట్లో మౌనికను తండ్రి దింపివేసి వెళ్లారు. కొద్దిగంటల్లోనే కుమార్తె మరణ వార్త రావడంతో తండ్రి రోదిస్తున్న తీరు గ్రామస్థులను కంటతడి పెట్టించింది. ఆమెకు భర్త రాజేశ్‌, కుమారుడు గౌతమ్‌ ఉన్నారు.  

మహబూబ్‌నగర్‌ ఎడ్యుకేషన్‌: 2010 కంటే ముందు నియమితులైన ఉపాధ్యాయులకు టెట్‌ నుంచి మినహాయింపు ఇవ్వాలని టీపీఆర్టీయూ రాష్ట్ర ప్రధాన కార్యదర్శి పర్వతి సత్యనారాయణ కోరారు. జిల్లా కేంద్రంలోని యూనియన్‌ కార్యాలయంలో బుధవారం ఏర్పాటుచేసిన సమావేశంలో ఆయన మాట్లాడారు. ఎన్‌సీటీఈ నుంచి సవరణ ఉత్తర్వులు ఇచ్చేవిధంగా ప్రభుత్వం కృషి చేయడంతో పాటు వేసవి సెలవుల్లో ఉపాధ్యాయ బదిలీలు, పదోన్నతులు చేపట్టేందుకు అవసరమైన చర్యలు తీసుకోవాలని కోరారు. ఉపాధ్యాయులకు కొన్నేళ్లుగా బదిలీలు, పదోన్నతులు లేకపోవడంతో ఇబ్బందులు ఎదుర్కొంటున్నారని తెలిపారు. రెండేళ్ల నుంచి పెండింగ్‌లో ఉన్న మెడికల్‌, జీపీఎఫ్‌, సరెండర్‌ బిల్లులను విడుదల చేయాలన్నారు. కార్యక్రమంలో టీపీఆర్టీయూ క్రమశిక్షణ కమిటీ చైర్మన్‌ యుగంధర్‌రెడ్డి, జిల్లా అధ్యక్ష, కార్యదర్శులు శ్యాంబాబు, రమాకాంత్‌, వర్కింగ్‌ ప్రెసిడెంట్‌ నాగిరెడ్డి, రాకేష్‌రెడ్డి, సతీష్‌కుమార్‌, శ్రీధర్‌, భూపతిసింగ్‌ తదితరులు పాల్గొన్నారు.

శ్రీరామ నవమిని పురస్కరించుకొని పాలమూరులో ఆధ్యాత్మిక శోభ సంతరించుకుంది. పలు ఆలయాలను సుందరంగా ముస్తాబు చేసి, సీతారాముల కల్యాణోత్సవాన్ని నయనానందంగా నిర్వహించారు. టీచర్స్‌కాలనీ సీతారామచంద్రాస్వామి ఆలయం, పంచముఖ ఆంజనేయస్వామి, శ్రీనివాసకాలనీ అభయాంజనేయస్వామి, అప్పన్నపల్లి, ఏనుగొండ, రాజేంద్రనగర్‌, శివశక్తినగర్‌ కాలనీ, భూలక్ష్మికాలనీ, అయోధ్యనగర్‌, హనుమాన్‌పూరల్లో జరిగిన శ్రీరామనవమి వేడుకల్లో ఎమ్మెల్యే యెన్నం శ్రీనివాస్‌రెడ్డి, మున్సిపల్‌ చైర్మన్‌ ఆనంద్‌గౌడ్‌ పాల్గొని ప్రత్యేక పూజలు చేశారు. శ్రీనివాస కాలనీ ఆంజనేయస్వామి, టీచర్స్‌కాలనీ రామాలయం, సంజయ్‌నగర్‌కాలనీ, టీడీగుట్ట, కుమ్మరివాడ వీరాంజనేయస్వామి తదితర ఆలయాల్లో నిర్వహించిన సీతారాముల కల్యాణోత్సవంలో ఎంపీ మన్నె శ్రీనివాస్‌రెడ్డి, మాజీ మంత్రి శ్రీనివాస్‌గౌడ్‌ పాల్గొని తిలకించారు. అప్పన్నపల్లిలోని ఆంజనేయస్వామి ఆలయంలో జరిగిన శ్రీరామనవమి వేడుకల్లో కాంగ్రెస్‌ ఎంపీ అభ్యర్థి చల్లా వంశీచంద్‌రెడ్డి సతీ సమేతంగా పాల్గొని ప్రత్యేక పూజలు చేశారు.

అయిజ: అమలు చేయలేని హామీలు చెబితే చాలామంది మోసపోయి కాంగ్రెస్‌ పార్టీకి ఓట్లేశారని, ఒక సారి మోసపోతే అవతల వారిది తప్పవుతుందని, రెండో సారి కాంగ్రెస్‌ పార్టీకి ఓట్లేస్తే వేసిన వారిదే తప్పవుతుందని ఎమ్మెల్సీ చల్లా వెంకట్రామిరెడ్డి అన్నారు. అయిజ మున్సిపాలిటీ పరిధిలోని రాయల్‌రెడ్డి ఫంక్షన్‌హాల్‌లో అయిజ మండల మున్సిపాలిటీ, మండల స్థాయి ముఖ్య కార్యకర్తల సమావేశం గురువారం నిర్వహించారు. సమావేశానికి ముఖ్య అతిథులుగా ఎమ్మెల్సీ చల్లా వెంకట్రామిరెడ్డి, అలంపూర్‌ ఎమ్మెల్యే విజయుడు హాజరవగా.. ఎమ్మెల్సీ మాట్లాడారు. గత శాసనసభ ఎన్నికల్లో అలంపూర్‌ నియోజకవర్గంలో 30 వేలకు పైగా బీఆర్‌ఎస్‌కు మెజార్టీ ఇచ్చారని అదే స్ఫూర్తితో ఎంపీ ఎన్నికల్లో కారు గుర్తుకు ఓట్లేసి, వేయించి బీఆర్‌ఎస్‌ అభ్యర్థి ఆర్‌ఎస్‌ ప్రవీణ్‌కుమార్‌ను అత్యధిక మెజార్టీతో గెలిపించాలని కార్యకర్తలకు, ప్రజలకు పిలుపునిచ్చారు. గెలిచిన వెంటనే డిసెంబర్‌ 9న రుణమాఫీ చేస్తానని, ఇప్పుడేమో ఆగస్ట్‌ 15లోపు రూ.2 లక్షల రుణమాఫీ చేస్తానని చెబుతున్నారన్నారు. ప్రజలను నమ్మించి ఎంపీ ఎన్నికల్లో ఓట్లేయించుకునేందుకు రెండో సారి ప్రయత్నిస్తున్నాడన్నారు. ఎమ్మెల్యే విజయుడు మాట్లాడుతూ.. అలంపూర్‌లో బీఆర్‌ఎస్‌ ఎమ్మెల్యే, ఎమ్మెల్సీ ఉన్నారని, ఎంపీగా ప్రవీణ్‌కుమార్‌ను గెలిపిస్తే ముగ్గురి సహకారంతో నియోజకవర్గాన్ని అభివృద్ధి పథంలో నడిపిస్తామన్నారు.

గట్టు: మండల పరిధిలోని బల్గెరలో నిర్వహిస్తున్న దిగంబరస్వామి జాతర సందర్భంగా గురువారం ఎడ్లబండ్ల గిరక పోటీలు నిర్వహించారు. ఈ పోటీలను తిలకించేందుకు చుట్టుపక్కల గ్రామాల రైతులు పెద్దఎత్తున తరలివచ్చారు. ఈ పోటీల్లో నాలుగు బహుమతులను కర్నూల్‌ జిల్లాకు చెందిన ఎడ్ల బండ్లు దక్కించుకున్నట్లు నిర్వాహకులు తెలియజేశారు. ఎడ్ల బండ్ల పోటీల్లో 3,721.3 ఫీట్ల దూరం గిరకను లాగి మొదటి బహుమతి రూ.20 వేలను కర్నూల్‌ జిల్లా హాలహర్వి ఈరన్నకు చెందిన ఎడ్ల దక్కించుకుంది. ద్వితీయ బహుమతి రూ.15 వేలను గుమ్మురాళ్ల పాలకుర్తికి చెందిన ఎడ్ల బండి 3,692.2 ఫీట్ల దూరం ఎడ్ల బండి గిరకను లాగి దక్కించుకున్నాయి. తృతీయ బహుమతి రూ.10 వేలను నల్గొండ రంగన్న ఎడ్ల బండి 3,608.9 ఫీట్ల ఎడ్ల బండి గిరకను లాగి దక్కించుకున్నాయి. నాలుగో బహుమతి రూ.5 వేలను రంగన్నకు చెందిన ఎడ్ల బండి 3,594 ఫీట్ల దూరం లాగి దక్కించుకున్నాయి. పోటీల్లో మొత్తం 15 జతల ఎడ్లు పాల్గొన్నట్లు నిర్వాహకులు తెలియజేశారు. బాసు శ్యామల, హనుమంతు నాయుడు తదితరులు పాల్గొన్నారు.

సాక్షి, నాగర్‌కర్నూల్‌: ఉమ్మడి జిల్లావ్యాప్తంగా రోజురోజుకూ ఉష్ణోగ్రతలు భగ్గుమంటున్నాయి. గురువారం నాగర్‌కర్నూల్‌ జిల్లా వంగూరు మండలంలో 46.0, కొల్లాపూర్‌ 46.0 డిగ్రీల అత్యధిక ఉష్ణోగ్రతలు నమోదు కాగా.. వెల్దండ, కల్వకుర్తి, మహబూబ్‌నగర్‌ జిల్లా జడ్చర్ల, చిన్నచింతకుంట, నారాయణపేట జిల్లాలోని ధ న్వాడ, కృష్ణా, కొత్తపల్లి, గద్వాల జిల్లా వడ్డేపల్లి, అయిజ, అలంపూర్‌ మండలాల్లో 45 డిగ్రీలకు పైగా ఉష్ణోగ్రతలు నమోదై.. రెడ్‌ అలర్ట్‌కు చేరింది. ఈ నెల 4, 5 తేదీల్లో ఉమ్మడి జిల్లావ్యాప్తంగా మరిన్ని పలు ప్రాంతాల్లో ఉష్ణోగ్రతలు 46 డిగ్రీలు దాటే అవకాశం ఉందని వాతావరణ శాఖ అంచనా వేసింది. ఈ మేరకు ప్రజలంతా జాగ్రత్తలు పాటించాలని అధికారులు హెచ్చరిస్తున్నారు. ఇప్పటికే ఈ నెల 5 వరకు ఉమ్మడి జిల్లాలోని మహబూబ్‌నగర్‌, నాగర్‌కర్నూల్‌, వనపర్తి, జోగుళాంబ గద్వాల, నారాయణపేట జిల్లాలకు వాతావరణ శాఖ ఆరెంజ్‌ అలర్ట్‌ను జారీ చేసింది. రెండ్రోజుల్లో ఉష్ణోగ్రతలు రెడ్‌ అలర్ట్‌ స్థాయి కి చేరుకుంటాయని చెబుతోంది. ఆదివా రం వరకు తీవ్రమైన వడగాల్పులు ఉంటాయని, ఈ నేపథ్యంలో తగు జాగ్రత్తలు తీసుకోవాలని సూచిస్తున్నారు. కాగా.. ఈ ఏడాది 46 డిగ్రీల ఉష్ణోగ్రతలు దాటడం ఇదే మొదటిసారి. పలు మండలాల్లో రెడ్‌ అలర్ట్‌కు చేరుకున్న ఉష్ణోగ్రతలు ఉమ్మడి జిల్లాలో నేడు, రేపు మరింత పెరిగే అవకాశం తీవ్రమైన వడగాల్పులు వీస్తాయని వాతావరణ శాఖ హెచ్చరిక అత్యవసరమైతేనే బయటకు వెళ్లాలని నిపుణుల సూచన

గద్వాల రూరల్‌: ఎన్నికల కమిషన్‌ ఆదేశాల మేరకు పార్లమెంట్‌ ఎన్నికల పోలింగ్‌ సమయాన్ని పొడిగించినట్లు జిల్లా ఎన్నికల అధికారి కలెక్టర్‌ సంతోష్‌ గురువారం ఒక ప్రకటనలో తెలియజేశారు. తీవ్రమైన ఎండల దృష్ట్యా పౌరులకు ఇబ్బంది కలుగకుండా ఉండేందుకు పోలింగ్‌ సమయాన్ని ఇంతకు ముందు ఉదయం 7 నుంచి సాయంత్రం 5 వరకు ఉండేది. ప్రస్తుతం దీనిని ఉదయం 7 గంటల నుంచి సాయంత్రం 6 గంటల వరకు పొడిగించి పోలింగ్‌ నిర్వహించడం జరుగుతుందన్నారు. ఈ అవకాశాన్ని జిల్లా ప్రజలు సద్వినియోగం చేసుకోవాలని తెలియజేశారు. రెండో విడత ర్యాండమైజేషన్‌ పూర్తి గద్వాల రూరల్‌: మే 13న జరిగే పార్లమెంట్‌ ఎన్నికల్లో భాగంగా నాగర్‌కర్నూల్‌ పార్లమెంట్‌ ఎన్నికల సాధారణ పరిశీలకులు రుచేశ్‌జైవన్షి ఆధ్వర్యంలో వనపర్తి ఓసీలోని ఎన్‌ఐసీ కేంద్రంలో వనపర్తి, గద్వాల జిల్లాలకు సంబంధించిన మైక్రో అబ్జర్వర్లను వనపర్తి జిల్లా ఎన్నికల అధికారి తేజస్‌ నందలాల్‌ పవార్‌, గద్వాల అదనపు కలెక్టర్‌ అపూర్వచౌహన్‌ సమక్షంలో రెండో విడత ర్యాండమైజేషన్‌ ప్రక్రియ పూర్తి చేసినట్లు తెలియజేశారు. కార్యక్రమంలో ఎల్‌డీఎం అయ్యప్ప, ఈడీఎం శివ పాల్గొన్నారు. ఓటు హక్కును వినియోగించుకోవాలి మల్దకల్‌: ఓటు విలువైంది. 18 ఏళ్లు నిండిన ప్రతిఒక్కరూ తమ ఓటు హక్కును వినియోగించుకోవాలని జెడ్పీ సీఈఓ కాంతమ్మ సూచించారు. గురువారం మల్దకల్‌లో ఓటు హక్కు వినియోగంపై అవగాహన కార్యక్రమం నిర్వహించారు. కార్యక్రమానికి డీఆర్‌డీఓ నర్సింగరావుతో పాటు ఆధికారులు సుధారాణి, రమేష్‌బాబు హాజరయ్యారు. ఈ సందర్భంగా వారు మాట్లాడారు. గ్రామాల్లో ప్రతి ఓటరుకు తమ ఓటు హక్కు వినియోగించుకునేలా చర్యలు తీసుకోవాలన్నారు. అలాగే బాల్యవివాహాలు, బాలకార్మిక నిర్మూలనపై అవగాహన కల్పించారు. సీడీపీఓ కమలాదేవి, నాగరాణి, ఎంపీఓ ప్రవీణ్‌కుమార్‌రెడ్డి తదితరులు పాల్గొన్నారు. గద్వాల మార్కెట్‌యార్డు సమాచారం గద్వాల వ్యవసాయం: గద్వాల మార్కెట్‌యార్డుకు గురువారం 645 క్వింటాళ్ల వేరుశనగ రాగా, గరిష్టంగా రూ.7,039, కనిష్టంగా రూ.3,002, సరాసరి రూ.5,729 ధరలు పలికాయి. 21 క్వింటాళ్ల ఆముదం రాగా.. గరిష్టంగా రూ.5,429, కనిష్టంగా రూ.4,666, సరాసరి రూ.5,429 ధరలు వచ్చాయి. 4,081 క్వింటాళ్ల వరి (సోన) రాగా గరిష్టంగా రూ.2,401, కనిష్టంగా రూ.1,509, సరాసరి ధర రూ.1,669 ధరలు వచ్చాయి. 26 క్వింటాళ్ల వరి (హంస) రాగా గరిష్టం, కనిష్టం, సరాసరి ధర రూ.1,702 పలికింది.

ధరూరు: మండల కేంద్రంలోని ఫర్టిలైజర్‌ అండ్‌ పెస్టిసీడ్స్‌ దుకాణాలను గురువారం గద్వాల వ్యవసాయ శాఖ ఏడీఏ సంగీతలక్ష్మి ఆకస్మికంగా తనిఖీ చేశారు. త్వరలో వానాకాలం సీజన్‌ ప్రారంభం కానున్న నేపధ్యంలో రైతులకు అవసరమయ్యే ఎరువులు సిద్ధంగా ఉంచాలని సూచించారు. ఈ సందర్భంగా ప్రస్తుతం దుకాణాలతో పాటు గోదాంలో ఉన్న నిల్వలను, రికార్డుల్లో చూయిస్తున్న నిల్వలను పరిశీలించారు. రైతులకు ఇబ్బందులు కలుగకుండా చూడాలని డీలర్లకు సూచించారు. అలాగే నాణ్యమైన ఎరువులు, విత్తనాలు అందించాలన్నారు. ప్రతి కొనుగోలుకు సంబంధించి రైతులు డీలర్ల నుంచి రషీదులు పొందాలన్నారు. ఏడీఏ సంగీతలక్ష్మి