● గాలిదుమారంతో నష్టంపై వ్యవసాయ శాఖ అంచనా ● సింగరేణి మండలంలోనే ప్రభావంఖమ్మంవ్యవసాయం: అకాల వర్షంతో జిల్లాలో 185.20ఎకరాల్లో పంటలకు నష్టం జరిగినట్లు వ్యవసాయ శాఖ ప్రాథమికంగా గుర్తించింది. జిల్లా అంతటా ఆదివారం సాయంత్రం ఈదురుగాలులు, ఉరుములు, మెరుపులతో కూడిన వర్షం కురిసింది. దీంతో కోత దశలో ఉన్న యాసంగి పంటలకు నష్టం వాటిల్లింది. నిబంధనల ప్రకారం 33 శాతా నికి పైగా జరిగిన నష్టాన్ని పరిగణనలోకి తీసుకుని అధికారులు అంచనాలు రూపొందించారు. జిల్లాలోని సింగరేణి మండలంలో మాత్రమే అకాల వర్షం కారణంగా పంటలకు నష్టం జరిగిందని, ఈ మండలంలో 102 మంది రైతులకు చెందిన వరి, మొక్కజొన్న, మామిడి 185.20 ఎకరాల్లో పంట లకు నష్టం ఏర్పడిందని గుర్తించారు. వరి, మొక్కజొన్న, మామిడికి నష్టం ఈదురుగాలులు, అకాల వర్షానికి సింగరేణి మండలంలోని పోలంపల్లి, కోటిలింగాల, ఉసిరికాయలపల్లి, కోమట్లగూడెం, ఎర్రుబోడుతో పాటు మొత్తం ఎనిమిది గ్రామాల్లో కోత దశలో ఉన్న వరి, మొక్కజొన్న, మామిడి పంటలకు నష్టం వాటిల్లింది. 35 మంది రైతులకు చెందిన 48 ఎకరాల్లో వరి, అరవై మంది రైతులకు చెందిన 83.20 ఎకరాల్లో మొక్కజొన్న 60, ఏడుగురు రైతులకు చెందిన 54 ఎకరాల్లో మామిడి నష్టం వాటిల్లినట్లు గుర్తించగా.. నివేదికను వ్యవసాయ శాఖ కమిషనర్‌కు పంపించారు. కాగా, కూసుమంచి, మధిర, ఖమ్మం వ్యవసాయ డివిజన్లలోనూ పంటలకు నష్టం జరిగినా 33 శాతా నికి మించకపోవడంతో పరిగణనలోకి తీసుకోలేదని సమాచారం. 11మండలాల్లో వర్షం జిల్లాలో ఆదివారం సాయంత్రం నుంచి రాత్రి వర కు 11మండలాల్లో వర్షం కురిసినట్లు వాతావరణ శాఖ ప్రకటించింది. సింగరేణి మండలంలో అధికంగా 89.2 మి.మీ.ల వర్షపాతం నమోదైంది. అలాగే, కామేపల్లి, మండలంలో 22.4, ఖమ్మం రూరల్‌ మండలంలో 7.2, ముదిగొండ మండలంలో 4.8, తిరుమలాయపాలెం మండలంలో 4.6, రఘునాథపాలెం మండలంలో 3.2, ఏన్కూరు మండలంలో 2.6, కూసుమంచి మండలంలో 2.4, ఖమ్మం అర్బన్‌ మండలంలో 1.4, నేలకొండపల్లి మండలంలో 1.2 మి.మీల వర్షపాతం నమోదైనట్లు తెలి పారు. ఈదురుగాలులకు చెట్లు కూలి రాకపోకలకు అంతరా యం ఏర్పడింది. అలాగే, విద్యుత్‌ లైన్లపై చెట్లు పడడంతో సరఫరా నిలిచిపోగా సోమవారం కొమ్మలు తొలగించి సరఫరా పునరుద్ధరించారు.

ఖమ్మం లోక్‌సభ ఎన్నిక బీఆర్‌ఎస్‌కు సవాల్‌గా మారింది. అసెంబ్లీ ఎన్నికల్లో ఆ పార్టీతో పోలిస్తే కాంగ్రెస్‌ పార్టీ మెజార్టీ ఓట్లు సాధించడం ఎదురీతకు కారణమవుతోంది. లోక్‌సభ నియోజకవర్గ పరిధిలోని ఏడు అసెంబ్లీ నియోజకవర్గాల్లో మొత్తంగా 2.65 లక్షల ఎక్కువ ఓట్లను కాంగ్రెస్‌ సొంతం చేసుకుంది. ఈ వ్యత్యాసాన్ని విశ్లేషిస్తే లోక్‌సభ ఎన్నికల్లో ఓటరు తీర్పు ఎలా ఉంటుందోనన్న ఉత్కంఠ బీఆర్‌ఎస్‌ నేతలు, శ్రేణుల్లో నెలకొంది. ఇక్కడ విజయం కోసం బీఆర్‌ఎస్‌ అభ్యర్థి నామ నాగేశ్వరరావుతో పాటు ఎంపీ వద్దిరాజు రవిచంద్ర, మాజీ మంత్రి పువ్వాడ అజయ్‌కుమార్‌, ఎమ్మెల్సీ, పార్టీ జిల్లా అధ్యక్షుడు తాతా మధు సర్వశక్తులొడ్డుతున్నా ఫలితం ఎలా ఉండబోతోందన్న చర్చ రాజకీయంగా ఆసక్తి రేపుతోంది. – సాక్షి ప్రతినిధి, ఖమ్మంనాడు అధికారంలో.. 2018 అసెంబ్లీ ఎన్నికల్లో ఖమ్మం పార్లమెంట్‌ పరిధిలోని ఖమ్మంలో మాత్రమే బీఆర్‌ఎస్‌ అభ్యర్థి పువ్వాడ అజయ్‌కుమార్‌ విజయం సాధించారు. ఆ తర్వాత ఆరు నియోజకవర్గాల్లో కాంగ్రెస్‌, టీడీపీ, ఇండిపెండెంట్లుగా గెలిచిన ఎమ్మెల్యేలు బీఆర్‌ఎస్‌లో చేరారు. అనంతరం 2019లో జరిగిన పార్లమెంట్‌ ఎన్నికల్లో బీఆర్‌ఎస్‌ అభ్యర్థి నామ నాగేశ్వరరావుకు 5,67,459 ఓట్లు, కాంగ్రెస్‌ అభ్యర్థి రేణుకా చౌదరికి 3,99,397 ఓట్లు వచ్చాయి. దీంతో 1,68,065 ఓట్ల మెజార్టీతో నామ విజయబావుటా ఎగురవేశారు. కాంగ్రెస్‌, బీఆర్‌ఎస్‌ మధ్య నాడు 14.74 శాతం ఓట్ల వ్యత్యాసం వచ్చింది. బీఆర్‌ఎస్‌ అధికారంలోకి రావడంతో పార్లమెంట్‌ ఎన్నికల్లో ఆ పార్టీ సునాయాసంగా గెలిచింది. కాగా, 2018 అసెంబ్లీ ఎన్నికల్లో లోక్‌సభ పరిధి ఏడు నియోజకవర్గాల్లో బీఆర్‌ఎస్‌ అభ్యర్థులకు 5,18,194 ఓట్లు వస్తే.. పార్లమెంట్‌ ఎన్నికల్లో నామాకు 49,265 ఓట్లు మాత్రమే అదనంగా నమోదయ్యాయి. ఇప్పుడు భారీ వ్యత్యాసం తాజా అసెంబ్లీ ఎన్నికల్లో కాంగ్రెస్‌, బీఆర్‌ఎస్‌ అభ్యర్థులకు వచ్చిన ఓట్లను పరిశీలిస్తే భారీ వ్యత్యాసం ఉంది. ఖమ్మం లోక్‌సభ పరిధిలోని ఏడు అసెంబ్లీ నియోజకవర్గాల్లో కాంగ్రెస్‌తో పాటు పొత్తులో భాగంగా సీపీఐ అభ్యర్థులకు 7,33,293 ఓట్లు వచ్చాయి. బీఆర్‌ఎస్‌ అభ్యర్థులకు 4,67,639 ఓట్లు మాత్రమే పోలయ్యాయి. తద్వారా కాంగ్రెస్‌ కూటమి 2,65,654 ఓట్ల మెజార్టీని సాధించినట్లయింది. ఈ గణాంకాలను పరిశీలిస్తూ కాంగ్రెస్‌ పార్టీ పార్లమెంట్‌ ఎన్నికల్లో తమ అభ్యర్థి గెలుపు నల్లేరుపై నడకేనని ధీమా వ్యక్తం చేస్తోంది. మరోపక్క అసెంబ్లీ ఎన్నికల్లో ఓట్లు తగ్గడం.. అధికారంలో కూడా లేకపోవడంతో బీఆర్‌ఎస్‌ అభ్యర్థికి ఎదురీత తప్పదా అన్న చర్చ కొనసాగుతోంది. ఖమ్మం లోక్‌సభ ఎన్నికలో బీఆర్‌ఎస్‌ ఎదురీత అసెంబ్లీ ఎన్నికల్లో కాంగ్రెస్‌ అభ్యర్థులకు మెజార్టీ ఓట్లు ఆ పార్టీతో పోలిస్తే ‘కారు’కు 2.65 లక్షల ఓట్ల వ్యత్యాసం ఈ ఎన్నికల్లో ఓటరు తీర్పు ఎటువైపోనని ఉత్కంఠపట్టు దొరికేది ఎక్కడ.. అసెంబ్లీ ఎన్నికల్లో కాంగ్రెస్‌ పార్టీ అభ్యర్థులు ఖమ్మం నియోజకవర్గంలో 49,381 ఓట్ల మెజార్టీ, పాలేరులో 56,650 మెజార్టీ, సత్తుపల్లిలో 19,440 ఓట్లు, మధిరలో 35,452 ఓట్ల మెజార్టీ, వైరాలో 33,045 ఓట్లు, కొత్తగూడెంలో సీపీఐ అభ్యర్థి 42,781 ఓట్ల మెజార్టీ, అశ్వారావుపేటలో 28,905 ఓట్ల మెజార్టీతో విజయం సాధించారు. ఎక్కడా కూడా బీఆర్‌ఎస్‌ అభ్య ర్థులు కాంగ్రెస్‌ అభ్యర్థులకు గట్టిపోటీ ఇవ్వలేక పోయారు. కాంగ్రెస్‌ కూటమి అభ్యర్థులకు ఏడు నియోజకవర్గాల్లోనూ భారీ మెజార్టీ రావడంతో ఈ పార్లమెంట్‌ ఎన్నికల్లో ఏ అసెంబ్లీ పరిధిలో ఎలా ఓట్లు దక్కించుకోవాలి, ఎక్కడ పట్టు దొరుకుతుందనే లెక్కల్లో బీఆర్‌ఎస్‌ నేతలు మునిగితేలుతున్నారు.ఇటీవల అసెంబ్లీ ఎన్నికల్లో కాంగ్రెస్‌ కూటమి, బీఆర్‌ఎస్‌కు వచ్చిన ఓట్లు.. నియోజకవర్గం కాంగ్రెస్‌ బీఆర్‌ఎస్‌ ఖమ్మం 1,36,016 86,635 పాలేరు 1,27,820 71,170 సత్తుపల్లి 1,11,245 91,805 మధిర 1,08,970 73,518 వైరా 93,913 60,868 కొత్తగూడెం (సీపీఐ) 80,336 37,555 అశ్వారావుపేట 74,993 46,088 మొత్తం 7,33,293 4,67,639

ఖమ్మం సహకారనగర్‌: గ్రామపంచాయతీల ప్రత్యేక అధికారులు జవాబుదారీతనంతో వ్యవహరిస్తూ సమస్యల పరిష్కారానికి పాటుపడాలని అదనపు కలెక్టర్‌ బి.సత్యప్రసాద్‌ సూచించారు. కలెక్టరేట్‌లో సోమవారం ఆయన జీపీల ప్రత్యేక అధికారులతో సమావేశమై పారిశుద్ధ్యం, తాగునీటి సరఫరా తదితర అంశాలపై సమీఓఇంచచారు. గ్రామాలు పరిశుభ్రంగా ఉండేలా పర్యవేక్షిస్తుండడంతో పాటు తాగునీటి సరఫరాకు అత్యంత ప్రాధాన్యత ఇవ్వాలని తెలిపారు. మిషన్‌ భగీరథ సరఫరా లేని చోట ప్రత్యామ్నాయ ఏర్పాట్లు చేయాలని, అవసరమైతే ప్రైవేట్‌ వనరులను లీజ్‌కు తీసుకోవాలన్నారు. అలాగే, నర్సరీలు, విద్యుద్దీపాలు, అంతర్గత రహదారుల నిర్వహణపై దృష్టి సారించాలని, సకాలంలో పన్నులు వసూలు చేయడమే కాక ప్రజలు వడదెబ్బ బారిన పడకుండా అవగాహన కల్పించాలని సూచించారు. ఈసమీక్షలో జెడ్పీ సీఈఓ వినోద్‌, డీఆర్డీఓ సన్యాసయ్య పాల్గొన్నారు. ఏకలవ్య మోడల్‌ స్కూళ్లలో ప్రవేశానికి పరీక్ష భద్రాచలంటౌన్‌: ఉమ్మడి జిల్లాలోని తెలంగాణ ప్రభుత్వ ఏకలవ్య మోడల్‌ సంక్షేమ విద్యాలయాల్లో 6వ తరగతిలో ప్రవేశాలుకల్పించేందుకు ఈనెల 28న పరీక్ష నిర్వహించనున్నట్లు భద్రాచలం ఐటీడీఏ పీఓ ప్రతీక్‌జైన్‌ తెలిపారు. ఈనెల 28న ఉదయం 10.30 గంటల నుంచి 12.30 వరకు పరీక్ష ఉంటుందని పేర్నొన్నారు. దరఖాస్తు చేసుకున్న విద్యార్థులు https:// tsemrs. telangana. gov. in వెబ్‌సైట్‌ ద్వారా హాల్‌టికెట్లు డౌన్‌లోడ్‌ చేసుకోవాలని సూచించారు. పరీక్షల నిర్వహణకు భద్రాద్రి జిల్లాలో మూడు, ఖమ్మం జిల్లాలో ఒక కేంద్రం ఏర్పాటు చేసినట్లు పీఓ తెలిపారు. స్వచ్ఛమైన తాగునీరు అందించాలి వైరా: వైరా రిజర్వాయర్‌ వద్ద సక్రమంగా క్లోరినేషన్‌ చేయడం ద్వారా ప్రజలకు స్వచ్ఛమైన తాగునీరు సరఫరా చేయాలని మిషన్‌ భగీరథ ఈఎన్‌సీ కృపాకర్‌రెడ్డి ఆదేశించారు. వైరా రిజర్వాయర్‌ గుట్టపై బోడేపూడి సుజల స్రవంతి పథకం, మిషన్‌ భగీరథ ఇన్‌ టేక్‌వెల్‌ ప్రాంతాలను సోమవారం ఆయన పరిశీలించారు. ఇటీవల రిజర్వాయర్‌ నుంచి రంగు మారిన నీరు సరఫరా అవుతుందనే ప్రచారంతో పరిశీలించిన ఆయన వివరాలు ఆరా తీశారు. ప్రస్తుతం రిజర్వాయర్‌లో నీటి నిల్వలు, క్లోరినేషన్‌ విధానంపై అధికారులను అడిగి తెలుసుకున్నారు. రిజర్వాయర్‌ డెడ్‌ స్టోరేజ్‌కు చేరుతున్న నేపథ్యాన నీరు కలుషితం కాకుండా చర్యలు చేపట్టాలని సూచించారు. సీఈ కె.శ్రీనివాస్‌, ఎస్‌ఈ సదాశివకుమార్‌, ఈఈలు వాణిశ్రీ, పుష్పలత, డీఈ నర్సింహమూర్తి, ఏఈ మణిశంకర్‌ పాల్గొన్నారు. విధుల్లో నిర్లక్ష్యాన్ని ఉపేక్షించేది లేదు తల్లాడ ప్రమాదంపై ఎన్పీడీసీఎల్‌ సీఎండీ ఆగ్రహం ఖమ్మంవ్యవసాయం: విద్యుత్‌ ఉద్యోగులు, సిబ్బంది విధుల్లో నిర్లక్ష్యంగా వ్యవహరిస్తే ఉపేక్షించేది లేదని ఎన్పీడీసీఎల్‌ సీఎండీ కర్నాటి వరుణ్‌రెడ్డి హెచ్చరించారు. జిల్లాలోని తల్లాడ సబ్‌స్టేషన్‌లో ఆదివారం ట్రాన్స్‌ఫార్మర్‌ పేలగా లైన్‌మెన్‌గా గాయాలయ్యాయి. ఈ నేపథ్యాన సీఎండీ సోమవారం ఫోన్‌ చేసి వివరాలు ఆరా తీశారు. ఉద్యోగులు, సిబ్బంది విధినిర్వహణలో నిబంధనలు పాటించాలని, పనిప్రాంతంలో గ్లౌజ్‌లు, హెల్మెట్‌ విధిగా ధరించాలని సూచించారు. తల్లాడ సబ్‌స్టేషన్‌లో జరిగిన ప్రమాదానికి అధికారుల నిర్లక్ష్యమే కారణమని పేర్కొన్న సీఎండీ.. అసిస్టెంట్‌ డివిజనల్‌ ఇంజనీర్‌ తీరుపై ఆగ్రహం వ్యక్తం చేసినట్లు తెలిసింది. వినియోగదారులకు మెరుగైన, నాణ్యమైన విద్యుత్‌ సరఫరా చేస్తూనే విధిగా భద్రతా చర్యలు పాటించాలని సూచించారు.

ఖమ్మం వైద్యవిభాగం: ఖమ్మంలో ఏర్పాటుచేసిన డయాగ్నస్టిక్‌ హబ్‌లో రకరకాల కొరతతో తరచూ పరీక్షలు నిలిచిపోతున్నాయి. రసాయనాల కొరత, యంత్రాల్లో లోపాలతో ఏ రోజు ఏ పరీక్ష ఉంటుందో సిబ్బందికే తెలియని పరిస్థితులు నెలకొన్నాయి. దీంతో వివిధ ప్రాంతాల నుంచి శాంపిళ్లు తీసుకొస్తున్నా లక్ష్యం మేరకు పరీక్షలు జరగడం లేదు. ఖమ్మం ప్రభుత్వ జనరల్‌ ఆస్పత్రిలో మూడేళ్ల క్రితం తెలంగాణ డయాగ్నస్టిక్‌ హబ్‌ నెలకొల్పారు. తొలుత 57 రకాల పరీక్షలు నిర్వహించగా క్రమంగా వాటి సంఖ్య పెంచడంతో ప్రస్తుతం 134 రకాల వ్యాధి నిర్ధారణ పరీక్షలు నిర్వహిస్తున్నట్లు చెబుతున్నారు. కానీ కొంత కాలంగా టెస్టులకు రసాయనాల సరఫరా సక్రమంగా లేకపోవడంతో అన్ని పరీక్షలు జరగడం లేదు. ఇటీవల రసాయనాల సరఫరా పూర్తిగా నిలిచిపోగా కొన్ని రోజుల పాటు పరీక్షలే నిలిచిపోయాయి. దీంతో అధికారులు మహబూబాబాద్‌, వరంగల్‌ ఆస్పత్రుల నుంచిరసాయనాలు తెప్పించి పని కానిచ్చేశారు. ఇదే పరిస్థితి తరచుగా ఎదురవుతుండడంతో అవసరమైన పరీక్షలు జరగక సామాన్యులు మళ్లీ ప్రైవేట్‌ డయాగ్నస్టిక్‌ సెంటర్లను ఆశ్రయించాల్సి వస్తోంది. తొలినాళ్లలో మంచి స్పందన డయాగ్నస్టిక్‌ హబ్‌కు తొలి నాళ్లలో మంచి స్పందన లభించింది. అప్పట్లో 57 రకాల పరీక్షలు అందుబాటులోకి తీసుకొచ్చారు. అనంతరం అదనంగా మరో 77 రకాల పరీక్షలను గత ఏడాది ప్రభుత్వం చేర్చింది. ఇలా 134రకాల పరీక్షలు చేయాల్సి ఉన్నా ఖమ్మం హబ్‌లో సగానికి కంటే తక్కువ పరీక్షలే జరుగుతున్నాయి. తరచూ రసాయనాల కొరత, సిబ్బంది అందుబాటులో లేకపోవడం, యంత్రాల మరమ్మతులు వంటి కారణాలతో ఆశించిన లక్ష్యం నెరవేరడం లేదు. సాధారణంగా హబ్‌లో ప్రతీ గంటకు 1,520 పరీక్షలు చేస్తారు. ఇందులో కెమిస్ట్రీ అనలైజర్‌ మిషన్‌ ద్వారా 1,200, ఇమ్యునో అనలైజర్‌ మిషన్‌ ద్వారా 220, సీబీపీ మిషన్‌ ద్వారా గంటకు వంద పరీక్షలు చేయాల్సి ఉన్నా ఆ స్థాయిలో జరగడంలేదు. 45 ఆస్పత్రుల నుండి శాంపిళ్లు జిల్లాలోని 45 ప్రభుత్వ ఆస్పత్రుల నుండి ఖమ్మం పెద్దాస్పత్రిలోని డయాగ్నస్టిక్‌ హబ్‌కు నిత్యం శాంపిల్స్‌ వస్తుంటాయి. పీహెచ్‌సీలు, అర్బన్‌ హెల్త్‌ సెంటర్లు, కమ్యూనిటీ హెల్త్‌ సెంటర్లు, బస్తీ దవాఖానాల్లో సేకరించిన శాంపిళ్లను వాహనాల్లో ఇక్కడకు తీసుకొస్తారు. ఇందుకోసం ఐదు రూట్లలో వాహనాలు తిరుగుతుంటాయి. అనంతరం హబ్‌లో పరీక్షలు చేసి 24గంటల్లోగా బాధ్యుల సెల్‌ఫోన్‌కు రిపోర్టు పంపిస్తారు. కానీ కొంత కాలంగా అనుకున్న స్థాయిలో పరీక్షలు జరగకపోగా... అవసరమైన వారు ప్రైవేట్‌ సెంటర్లను ఆశ్రయించాల్సివస్తోంది. ప్రస్తుతం హబ్‌లో సీబీపీ, గర్భిణులకు నిర్వహించే కోయోగ్లేషన్‌ టెస్టులు, ఇతర అవసరమైన టెస్టులు అందుబాటులో లేవని సమాచారం. అన్ని పరీక్షలు జరిగేలా చర్యలు డయాగ్నస్టిక్‌ హబ్‌లో అన్ని రకాల పరీక్షలు అందుబాటులోకి తీసుకొచ్చేలా చర్యలు తీసుకుంటున్నాం. రసాయనాల కొరతతో అప్పుడప్పుడు కొంత ఏర్పడుతుండడంతో ఉన్నతాధికారులకు నివేదించాం. త్వరలోనే ఆ సమస్యకు పరిష్కారం లభిస్తుంది. హబ్‌లో ఎలాంటి ఇబ్బందులు లేకుండా పరీక్షలు జరిగేలా చూస్తున్నాం. డాక్టర్‌ బి.అమర్‌సింగ్‌, ఆర్‌ఎంఓ, ఖమ్మం జనరల్‌ ఆస్పత్రి తరచుగా పరీక్షలకు అంతరాయాలు పేరుకు 134 పరీక్షలు.. అందేవి అంతంతే ఖమ్మం డయాగ్నస్టిక్‌ హబ్‌లో రసాయనాల లేమితో ఇక్కట్లు సిబ్బంది కొరత, యంత్రాల మరమ్మతులతో ఇంకొంత సమస్య

● ఎంపీగా నామను గెలిపిస్తేనే అది సాధ్యం ● ప్రచార సమావేశాల్లో బీఆర్‌ఎస్‌ ప్రజాప్రతినిధులుఖమ్మం రూరల్‌/తిరుమలాయపాలెం: అసెంబ్లీ ఎన్నికలకు ముందు మాయమాటలు చెప్పి అధికారంలోకి వచ్చిన కాంగ్రెస్‌ పార్టీకి తగిన గుణపాఠం చెప్పాలంటే లోక్‌సభ ఎన్నికల్లో బీఆర్‌ఎస్‌ అభ్యర్థి నామ నాగేశ్వరరావు గెలిపించాలని పలువురు పిలుపునిచ్చారు. ఖమ్మం రూరల్‌ మండలం పల్లెగూడెం, తిరుమలాయపాలెం మండలం పిండిప్రోలులో జరిగిన ప్రచార సమావేశాల్లో అభ్యర్థి నామతో పాటు ఎంపీ వద్దిరాజు రవిచంద్ర, ఎమ్మెల్సీ తాతా మధుసూదన్‌, మాజీ ఎమ్మెల్యేలు కందాళ ఉపేందర్‌రెడ్డి, సండ్ర వెంకటవీరయ్య పాల్గొని మాట్లాడారు. రాష్ట్రంలో కాంగ్రెస్‌ అధికారంలోకి వచ్చాక రైతులు, సామాన్య ప్రజల కష్టాలు కళ్లెదుటే కనబడుతున్నాయని తెలిపారు. రాష్ట్ర ప్రజల హక్కులను కాపాడాలన్నా, జిల్లా అభివృద్ధి చెందాలన్నా నామ గెలుపు తప్పనిసరని చెప్పారు. గత అసెంబ్లీ ఎన్నికల్లో కాంగ్రెస్‌ను గెలిపించినందుకు తప్పు చేశామని భావిస్తున్న ప్రజలకు బీఆర్‌ఎస్‌ హయాంలో అమలైన సంక్షేమ పథకాలను వివరిస్తూ నామ గెలుపునకు పాటుపడాలని పార్టీ శ్రేణులకు పిలుపునిచ్చారు. కాగా, కాంగ్రెస్‌ అధికారంలోకి వచ్చాక పలు సంక్షేమ పథకాలను తొలగించడమే కాక హామీలను నెరవేర్చడం లేదంటూ బీఆర్‌ఎస్‌ జిల్లా అధ్యక్షుడు, ఎమ్మెల్సీ తాతా పాట రూపంలో వివరించారు. అలాగే, బీఆర్‌ఎస్‌ కార్యకర్తలు, నాయకులపై తప్పుడు కేసులు పెడుతున్న పోలీసులు తీరు మార్చుకోవాలని సూచించారు. ఈ సమావేశాల్లో ఎంపీపీ బి.ఉమ, నాయకులు తాళ్లూరి జీవన్‌కుమార్‌, బెల్లం వేణు, బాషబోయిన వీరన్న, గుడిబోయిన దర్గయ్య, లక్ష్మణ్‌, వెంకటేశ్వర్లు, ఏ.వరప్రసాద్‌, దేవరం దేవేందర్‌రెడ్డి, మాలతి, చావా వేణు, ఆలస్యం నాగేశ్వరరావు, రవి, చామకూరి రాజు తదితరులు పాల్గొన్నారు. ● ఖమ్మం లీగల్‌: బీఆర్‌ఎస్‌ అభ్యర్థి నామా నాగేశ్వరరావు ఖమ్మం కోర్టు ప్రాంగణంలో న్యాయవాదులు, న్యాయ శాఖ ఉద్యోగులను కలిసి తనను గెలిపించాలని కోరారు. బీఆర్‌ఎస్‌ లీగల్‌ సెల్‌ నాయకులు బిచ్చాల తిరుమలరావు, కొత్తా వెంకటేశ్వరరావు, మేకల సుగుణారావు తదితరులు పాల్గొన్నారు.

● బీఆర్‌ఎస్‌ కార్యకర్తలు ప్రజలతో మమేకం కావాలి ● ఎంపీ వద్దిరాజు, ఎమ్మెల్సీ మధుఖమ్మంమయూరిసెంటర్‌/నేలకొండపల్లి/కూసుమంచి: రాష్ట్రంలో ఇచ్చిన హామీలను విస్మరించిన కాంగ్రెస్‌ తీరుతో ప్రజలు ఆలోచనలో పడ్డారని ఎంపీ వద్ది రాజు రవిచంద్ర, ఎమ్మెల్సీ తాత మధుసూదన్‌రావు తెలిపారు. ఖమ్మంలోని బీఆర్‌ఎస్‌ జిల్లా కార్యాలయంలో గురువారం నిర్వహించిన పార్టీ కార్యకర్తల సమావేశంలో వారు మాట్లాడుతూ కాంగ్రెస్‌ మోసాలను బీఆర్‌ఎస్‌ కార్యకర్తలు గడపగడపకూ తీసుకెళ్లాలని సూచించారు. తద్వారా బీఆర్‌ఎస్‌ అభ్యర్థి నామ నాగేశ్వరరావు విజయానికి పాటుపడాలని తెలిపారు. అనంతరం ఎంపీ అభ్యర్థి నామ నాగేశ్వరరావు మాట్లాడుతూ మరోమారు తన విజయానికి పార్టీ శ్రేణులు సహకరించాలని కోరారు. అలాగే, సాయంత్రం నేలకొండపల్లి, కూసుమంచిలో నిర్వహించిన రోడ్డుషోల్లో ఎంపీ వద్దిరాజు రవిచంద్ర, మాజీ ఎమ్మె ల్యే కందాల ఉపేందర్‌రెడ్డి మాట్లాడుతూ ఓట్ల కోసం వచ్చే కాంగ్రెస్‌ నాయకులను హామీలు విస్మరించడంపై నిలదీయాలని సూచించారు. కాంగ్రెస్‌ చేతిలో ప్రజలు మరోమారు మోసపోకుండా బీఆర్‌ఎస్‌ అభ్యర్థి నామను గెలిపించాలని కోరారు. నామ నాగేశ్వరరావు మాట్లాడుతూ రైతు బిడ్డనైనా తాను స్థానికంగా ఉంటానని. మరోమారు భారీ మెజార్టీతో గెలిపించా లని విజ్ఞప్తి చేశారు. ఈసమావేశాల్లో బీఆర్‌ఎస్‌ ఖమ్మం నగర అధ్యక్షుడు పగడాల నాగరాజు, నాయకులు, ప్రజాప్రతినిధులు శీలంశెట్టి వీరభద్రం, బుర్రి వెంకట్‌, పొన్నం వెంకటేశ్వర్లు, వెంకటరమణ, మో తారపు సుధాకర్‌, దోరేపల్లి శ్వేత, పగడాల శ్రీవి ద్య, వినయ్‌, పార్థసారధి, తాజుద్దీన్‌, ధనలక్ష్మి, నాగుబండి శ్రీనివాసరావు, కాసాని నాగేశ్వరరావు, తెల్లగొర్ల చిన్నలింగస్వామి, వేముల వీరయ్య పాల్గొన్నారు.

సాక్షిప్రతినిధి, ఖమ్మం: ‘గత అసెంబ్లీ ఎన్నికల్లో ప్రజలు బీఆర్‌ఎస్‌ను తిరస్కరించి.. కాంగ్రెస్‌కు పట్టం కట్టారు. ఆ ఫలితాలే పార్లమెంట్‌ ఎన్నికల్లోనూ రిపీట్‌ అవుతాయి. ఖమ్మం పార్లమెంట్‌ పరిధిలోని నియోజకవర్గాల్లో విస్తృతంగా ప్రచారం నిర్వహిస్తున్నాం. పదేళ్ల పాటు ముఖ్యమంత్రిగా పనిచేసిన కేసీఆర్‌ ప్రజలకు ఇచ్చిన అనేక హామీలను అమలు చేయలేకపోయారు. అయినా కొత్తగా ఏర్పడిన కాంగ్రెస్‌ ప్రభుత్వంపై కేసీఆర్‌ విమర్శలు చేయడం తొందరపాటు చర్య. నా విజయానికి డిప్యూటీ సీఎం మల్లు భట్టివిక్రమార్క, మంత్రులు పొంగులేటి శ్రీనివాసరెడ్డి, తుమ్మల నాగేశ్వరరావు, ఎంపీ రేణుకాచౌదరి, పార్టీ నేతలు, కేడర్‌ కృషి చేస్తున్నారు. ప్రచారంలో ప్రజల నుంచి మంచి స్పందన వస్తుండగా.. అత్యధిక మెజార్టీతో విజయం సాధిస్తా. నేను స్థానికేతరుడినని చెబుతున్న వారు మా స్వస్థలం కూసుమంచి మండలం చేగొమ్మగా గుర్తించాలి..’ అని ఖమ్మం లోక్‌సభ కాంగ్రెస్‌ అభ్యర్థి రామసహాయం రఘురాంరెడ్డి పేర్కొన్నారు. గురువారం ‘సాక్షి’కి ఇచ్చిన ఇంటర్వ్యూలో రఘురాంరెడ్డి వెల్లడించిన వివరాలు ఆయన మాటల్లోనే..●ప్రజల నుంచి స్పందన బాగుంది.. గత నెల 25న నామినేషన్‌ వేసింది మొదలు ప్రతీ అసెంబ్లీ నియోజకవర్గ పరిధిలోని మండలాల్లో ప్రచారం చేస్తున్నాం. కార్యకర్తలతో భేటీ అవుతూ సభల్లో పాల్గొంటున్నాం. ఇప్పటి వరకు నాలుగు అసెంబ్లీ నియోజకవర్గాల్లో ప్రచారం పూర్తయింది. ప్రచారంలో ప్రజల నుంచి మంచి స్పందన వచ్చింది. ఈనెల 4న కొత్తగూడెంలో సీఎం రేవంత్‌రెడ్డి ప్రచారానికి వస్తున్నారు. దీంతో మాకు మరింత అనుకూలమైన వాతావరణం ఏర్పడుతుంది. ●కాంగ్రెస్‌కే పట్టం ఖాయం అసెంబ్లీ ఎన్నికల్లో ప్రజలు కేసీఆర్‌కు తమ సత్తా చూపించారు. గత పదేళ్లలో ముఖ్యమంత్రిగా కేసీఆర్‌ ఉద్యోగ నియామకాలు, రైతులకు రూ.లక్ష రుణమాఫీ, పేదలకు ఇళ్ల స్థలాలు అందజేస్తామని ఇచ్చిన హామీలు అమలు కాలేదు. ఇక రూ.లక్ష కోట్లతో నిర్మించిన కాళేశ్వరం ఏమైందో అందరం చూస్తున్నాం. ఉద్యోగ నియామక పరీక్షల పేపర్‌ లీకేజీలతో నిరుద్యోగులు ఇబ్బంది పడ్డారు. ఇక ఎమ్మెల్యేలు ప్రజలను అనేక విధాలుగా అవస్థ పెట్టారు. వీటితో విసిగిపోయిన ప్రజలు అసెంబ్లీ ఎన్నికల్లో కాంగ్రెస్‌కు అనుకూలంగా తీర్పు చెప్పారు. అదేమాదిరి లోక్‌సభ ఎన్నికల్లోనూ ఫలితాలు వస్తాయి. దేశవ్యాప్తంగా శక్తివంతంగా తయారైన ఇండియా కూటమి.. సీపీఎం, సీపీఐ, ఇతర పార్టీలతో కలిసి ఎన్నికల్లో సత్తా చాటుతుంది. ●150 రోజులకే ఉలుకెందుకు.. కాంగ్రెస్‌ ఇచ్చిన హామీలపై మాజీ ముఖ్యమంత్రి కేసీఆర్‌ ఇష్టం వచ్చినట్లుగా మాట్లాడుతున్నారు. ప్రభుత్వంపై దుష్ప్రచారం చేస్తున్నారు. ఆయన పదేళ్లు పాలించి సమస్యలు పరిష్కరించలేదు. కానీ కాంగ్రెస్‌ ప్రభుత్వం అధికారంలోకి వచ్చి కేవలం 150 రోజుల్లోనే ఆయనకు అంత ఉలుకెందుకు? కరెంట్‌ కోతలున్నాయని ఆరోపిస్తున్నారు. జిల్లా, రాష్ట్రంలో ఎక్కడా కరెంట్‌ ఇబ్బందులు లేవు. కావాలనే కేసీఆర్‌, ఆ పార్టీ శ్రేణులు గోబెల్స్‌ ప్రచారం చేస్తున్నారు. ఇప్పటికే 65 లక్షల మంది రైతులకు రైతుబంధు ముట్టింది. మిగిలిన హామీలను కూడా మా ప్రభుత్వం కచ్చితంగా నెరవేరుస్తుంది. ●అందరూ కలిసి వస్తున్నారు.. ప్రచారానికి తక్కువ సమయం ఉండడంతో అన్నిచోట్ల పర్యటించేలా షెడ్యూల్‌ తయారు చేసుకున్నాం. జిల్లాలో ముగ్గురు శక్తివంతమైన మంత్రులు ఉన్నారు. ఉప ముఖ్యమంత్రి భట్టి విక్రమార్క మంత్రి తుమ్మల నాగేశ్వరరావు సుదీర్ఘకాలంగా రాజకీయాల్లో ఉన్నారు. మరో మంత్రి పొంగులేటి శ్రీనివాసరెడ్డి ప్రచారంలో పాల్గొంటున్నారు. ఎంపీ రేణుకాచౌదరి వస్తున్నారు. వీరితోపాటు ఎమ్మెల్యేలు, ఇతర ప్రజాప్రతినిధులు, నేతలు, కార్యకర్తలు ప్రచారంలో కలిసొస్తున్నారు. ఏళ్ల తర్వాత ఉమ్మడి ఖమ్మం జిల్లాకు ప్రాముఖ్యత లభించింది. గతంలో జలగం వెంగళరావు ఉన్నప్పుడు ఇలా ఉండేది. ఈ అవకాశం కల్పించిన ముఖ్యమంత్రి రేవంత్‌రెడ్డికి ధన్యవాదాలు. ●సమస్యల పరిష్కారంపై దృష్టి నేను గెలవగానే లోక్‌సభ పరిధిలో ప్రజలు ఎదుర్కొంటున్న సమస్యలపై దృష్టి సారిస్తా. ఖమ్మంలో యూనివర్సిటీ మాత్రమే కాదు.. కొత్తగా ఏర్పడిన భద్రాద్రి కొత్తగూడెం జిల్లాలో కేంద్రియ విద్యాలయం కూడా లేదు. స్పాంజ్‌ ఐరన్‌ ఇండస్ట్రీ మూతపడింది. ఇక భద్రాచలం రోడ్‌–కొవ్వూరు రైల్వేలైన్‌ డిమాండ్‌ నెరవేరడం లేదు. కొత్తగూడెంలో విమానాశ్రయం.. ఇలా ఎన్నో సమస్యలు ఉన్నాయి. ప్రభుత్వాల నుంచి నిధులు తీసుకొచ్చి పనులు చేయిస్తా. ప్రచారంలో ప్రజల నుంచి మంచి స్పందన డిప్యూటీ సీఎం, మంత్రులు, ఎంపీ రేణుక, పార్టీ శ్రేణుల కృషితో గెలుస్తా.. లోక్‌సభ ఎన్నికల్లోనూ అసెంబ్లీ ఫలితాలే రిపీట్‌ మాజీ ముఖ్యమంత్రి కేసీఆర్‌వి తొందరపాటు విమర్శలు ఖమ్మం కాంగ్రెస్‌ అభ్యర్థి రామసహాయం రఘురాంరెడ్డి కాంగ్రెస్‌లో మూడు తరాలు నేను స్థానికుడిని కాదని కొందరు విమర్శిస్తున్నారు. మాది కూసుమంచి మండలంలోని చేగొమ్మ. ఇక్కడ వ్యాపారాలు కూడా ఉన్నాయి. మా నాన్న నాలుగు సార్లు లోక్‌సభ, నాలుగు సార్లు అసెంబ్లీ ఎన్నికల్లో గెలిచారు. మా తాత ఉమ్మడి జిల్లాలో పార్టీ కోసం పనిచేశారు. అలా మూడు తరాలుగా మా కుటుంబానికి కాంగ్రెస్‌ పార్టీతో పాటు ఉమ్మడి జిల్లాతో అనుబంధం ఉంది. నేను గతంలో రాజ్యసభ, ఎమ్మెల్సీ, ఎమ్మెల్యే టికెట్లు ఆశించినా కొన్ని కారణాలతో పోటీ చేయలేకపోయాను. ఈ ఎన్నికల్లో తప్పనిసరిగా మంచి మెజార్టీతో గెలుస్తా.

చింతకాని: మండలంలోని పందిళ్లపల్లికి చెందిన వృద్ధుడు పూనాటి రామయ్య(83) గురువారం వడదెబ్బ బారిన పడి మృతి చెందాడు. ఎండ తీవ్రతకు తట్టుకోలేక ఆయన వడదెబ్బ బారిన పడగా మృతి చెందాడని కుటుంబీకులు తెలిపారు. రామయ్యకు ఇద్దరు కుమారులు ఉన్నారు. మంగాపురంలో రెండు గేదెలు మృతి నేలకొండపల్లి: మండలంలోని మంగాపురంలో రెండు గేదెలు ఆకస్మాత్తుగా మృతి చెందాయి. గ్రామానికి చెందిన భూక్యా సైదులు గేదెలు రోజు మాదిరిగా గురువారం మేతకు వెళ్లాయి. సాయంత్రం ఇంటికి తిరిగి వచ్చాక ఒక్కసారిగా కుప్పకూలి మృతి చెందాయి. పాడిపై ఆధారపడి జీవిస్తున్న సైదులు కుటుంబం ఈ ఘటనతో కన్నీరుమున్నీరుగా విలపించింది. ఇక మండలంలోని చెరువుమాధారంలో ఓ రైతుకు చెందిన వ్యవసాయ బావిలో గురువారం ప్రమాదవశాత్తు నాలుగు గేదెలు పడ్డాయి. మేతకు వెళ్లిన సమయాన తాగునీటి కోసం వెళ్లి బావిలో పడినట్లు తెలుస్తోంది. ఈవిషయాన్ని గుర్తించే లోగా చీకటి పడడంతో బయటకు తీసేందుకు రైతులు ప్రయత్నిస్తున్నారు. విద్యుదాఘాతంతో ఎద్దు, మేక... రఘునాథపాలెం: మండలంలోని పంగిడిలో తెగి పడిన విద్యుత్‌ తీగలను తాకడంతో షాక్‌కు గురైన ఎద్దు, మేక మృతి చెందాయి. ఇటీవల వచ్చిన ఈదురుగాలులతో గ్రామ శివారులోని వ్యవసాయ పొలాల్లో 11 కేవీ విద్యుత్‌ తీగ తెగిపడింది. అయినా సరఫరా నిలిపివేయకపోవడంతో గురువారం శంకర్‌కు చెందిన ఎద్దు, చిన్నాకు చెందిన మేక తీగను తాకగా షాక్‌ గురై మృతి చెందాయి. సమాచారం అందుకున్న విద్యుత్‌శాఖ అధికారులు వివరాలు సేకరించారు.

ఖమ్మం లోక్‌సభ బీజేపీ అభ్యర్థి తాండ్ర వినోద్‌రావు తరఫున ఆయన సతీమణి వినీలరావు విస్తృతంగా ప్రచారం చేస్తున్నారు. అభ్యర్థి వినోద్‌రావు గురువారం ఉదయం ఖమ్మంలోని పటేల్‌ స్టేడియంలో డాక్టర్‌ గోంగూర వెంకటేశ్వర్లుతో కలిసి వాకింగ్‌ చేస్తూ వాకర్లను ఓట్లు అభ్యర్థించారు. ఆతర్వాత ఖమ్మం రూరల్‌ మండల కేంద్రంలో జరిగిన సభలోనూ పాల్గొన్నారు. ఇక వినోద్‌రావు సతీమణి వినీల ఖమ్మం 9, 53వ డివిజన్లలో ఇంటింటి ప్రచారం చేశారు. ఇంటింటికీ వెళ్లి ఓటర్లను కలిసిన ఆమె కమలం పువ్వు గుర్తుపై ఓటు వేసి వినోద్‌రావు గెలిపించాలని, తద్వారా జిల్లా సమగ్రాభివృద్ధి సాధ్యమవుతుందని తెలిపారు. ఇక వినోద్‌రావు కుమారులు తాండ్ర వినీత్‌, వినయ్‌ సైతం జిల్లాలోని పలు ప్రాంతాల్లో ప్రచారం చేశారు. – ఖమ్మం మామిళ్లగూడెం

ఖమ్మంసహకారనగర్‌: ఎన్నికలు పారదర్శకంగా నిర్వహించడమే కాక ఓటర్లకు సులువుగా సమాచారాన్ని అందించేందుకు కేంద్ర ఎన్నికల సంఘం చర్యలు చేపడుతోంది. ఇందులో భాగంగా వివిధ రకాల యాప్‌లను అందుబాటులోకి తీసుకొచ్చింది. తద్వారా ఓటరు ఎక్కడ నుంచైనా సెల్‌ఫోన్‌ ద్వారా పలు వివరాలు తెలుసుకునే వెసలుబాటు కలుగుతోంది. అంతేకాక పలు వెబ్‌సైట్ల ద్వారా కూడా వివరాలు తెలుసుకోవచ్చు. ఈ సందర్భంగా కొన్ని యాప్‌లు, వెబ్‌సైట్ల వివరాలు... ● ఓటరు హెల్ప్‌లైన్‌ ఎన్నికలు సమీపిస్తున్న క్రమాన ఓటరు జాబితాలో పేరు ఉందో, లేదో తెలుసుకునేందుకు అనేక మార్గాలు అందుబాటులో ఉన్నాయి. ఈమేరకు వివిధ వెబ్‌సైట్ల (voter.gov.in, ceotelangana.gov.in, nvsp.in, voterhelpline)ను ఏర్పాటుచేశారు. వీటిలో పేరు, ఫోన్‌ నంబర్‌, ఎపిక్‌ కార్డు నంబర్‌ తదితర ఆధారాల ప్రకారం జాబితాలో పేరు, ఉందా లేదా అని చూడడంతో పాటు పోలింగ్‌ బూత్‌ల వివరాలు కూడా తెలుసుకోవచ్చు. ఇంకా సులభంగా ఓటు వివరాలు తెలుసుకునేందుకు కలెక్టరేట్‌లోని కంట్రోల్‌ రూమ్‌ నంబర్‌ 1950 ఫోన్‌ చేయొచ్చు. ఈ టోల్‌ ఫ్రీ నెంబర్‌ నిరంతరాయంగా పనిచేస్తుంది. ● కేవైసీ యాప్‌ ఎన్నికల బరిలో నిలిచిన అభ్యర్థుల వివరాలను తెలుసుకోవాలంటే గతంలో ఇబ్బందులు ఎదురయ్యేవి. ప్రస్తుతం ఆండ్రాయిడ్‌ మొబైల్‌లో కేవైసీ(నో యువర్‌ క్యాండిడేట్‌) యాప్‌ను డౌన్‌లోడ్‌ చేసుకుంటే లోక్‌సభ బరిలో ఎందరు అభ్యర్థులు ఉన్నారో సులభంగా తెలుసుకోవచ్చు. అంతేకాక అభ్యర్థి విద్యార్హతలు, వారి నేరచరిత్ర, ఆస్తులు, అప్పులు ఇలా అన్ని వివరాలు తెలిసిపోతాయి. ●● సక్షం యాప్‌ వృద్ధులు, దివ్యాంగుల కోసం సక్షం యాప్‌ అందుబాటులోకి తీసుకొచ్చారు. పోలింగ్‌ కేంద్రానికి వచ్చి ఓటు వేయలేని వారు ఈ యాప్‌లో వివరాలు నమోదు చేసుకుంటే అధికారులు పరిశీలించి పోలింగ్‌ కేంద్రానికి రవాణా సౌకర్యం కల్పిస్తారు. అయితే, ప్రస్తుత ఎన్నికల్లో మాత్రం అధికారులు వృద్ధులు, దివ్యాంగుల నుంచి ముందుగా దరఖాస్తులు స్వీకరించి హోం ఓటింగ్‌కు అవకాశం కల్పించారు.