కరీంనగర్‌: ‘నేను పక్కా లోకల్‌.. రూ.12 వేల కోట్ల నిధులతో కరీంనగర్‌ నియోజకవర్గ అభివృద్ధి కోసం కృషి చేశా’నని బీజేపీ ఎంపీ అభ్యర్థి బండి సంజయ్‌ అన్నారు. హుస్నాబాద్‌లో సోమవారం కార్యకర్తల సమావేశం నిర్వహించారు.ముందుగా గిరిజన మహిళలు సంప్రదాయ దుస్తులు ధరించి స్వాగతం పలికారు. సమావేశంలో బండి సంజయ్‌ మాట్లాడుతూ బీఆర్‌ఎస్, కాంగ్రెస్‌ పార్టీలకు అభ్యర్థులు దొరకక, బయటి ప్రాంతాల నుంచి తీసుకువస్తున్నారన్నారు. గత ప్రభుత్వం గ్రామ పంచాయతీలకు నయా పైసా ఇవ్వలేదని, అందుకే మాజీ సర్పంచ్‌లు బీజేపీలో చేరుతున్నారని తెలిపారు. గ్రామ పంచాయతీలు, మున్సిపాలిటీ, కార్పొరేషన్ల అభివృద్ధికి కేంద్రమే నిధులు ఇచ్చిందన్నారు. కేంద్రం ఇచ్చిన నిధులతోనే గత బీఆర్‌ఎస్‌ ప్రభుత్వం కరెంట్‌ బిల్లులను కట్టిందన్నారు. పల్లెల అభివృద్ధికి పాటుపడిన సర్పంచ్‌లను నిలువునా మోసం చేసిందన్నారు. ఆరు గ్యారంటీలను అమలు చేస్తామని గద్దెనెక్కిన కాంగ్రెస్‌కు ఎందుకు ఓటు వేయాలో ప్రజలు ఆలోచించాలన్నారు. కరీంనగర్‌ ఎంపీగా నన్ను ఓడించేందుకు బీఆర్‌ఎస్, కాంగ్రెస్‌ పార్టీలు లోపాయికారి ఒప్పందం చేసుకున్నాయని ఆరోపించారు. ‘హుస్నాబాద్‌ ఎమ్మెల్యే నన్ను వెధవ అంటున్నారు. ఆయనపై నాకు ఎలాంటి ద్వేషం లేదు. ఆయన నన్ను ఎంత తిట్టినా పడతా’నని బండి అన్నారు. హామీలపై మొదట శ్వేత పత్రం విడుదల చేయాలన్నారు. నిజామాబాద్‌ అర్బన్‌ ఎమ్మెల్యే ధన్‌పాల్‌ సూర్యనారాయణ, మాజీ ఎమ్మెల్యే నందీశ్వర్‌ గౌడ్, ఎస్టీ మోర్చా రాష్ట్ర అధ్యక్షుడు కల్యాణ్‌ నాయక్, పార్టీ రాష్ట్ర నాయకులు పాల్గొన్నారు. ఇవి చదవండి: బీజేపీ, బీఆర్‌ఎస్‌ అభ్యర్థులు కేసీఆర్‌ లాంటి దొరలే..!

హుజూరాబాద్‌: మాదిగల రాజకీయ ఎదుగుదలకు కాంగ్రెస్‌ పార్టీ నమ్మించి ద్రోహం చేసిందని ఎమ్మార్పీఎస్‌ వ్యవస్థాపక అధ్యక్షుడు మందకృష్ణ అన్నారు. సోమవారం రాత్రి హుజురా బాద్‌లో ఎమ్మార్పీఎస్‌ ఎంఎస్పీ విస్తృతస్థాయి సమావేశం జరిగింది. ఈ సందర్భంగా మందకృష్ణ మాట్లాడుతూ.. మాట ఇచ్చి మోసం చేయడంలో కాంగ్రెస్‌ పార్టీ ఆరితేరిందని అన్నారు. పార్లమెంటు ఎన్నికల్లో మూడు,నాలుగు సీట్లు రావాల్సి ఉండగా ఒకటి కూడా ఇవ్వకుండా కాంగ్రెస్‌ అధిష్టానం, సీఎం రేవంత్‌రెడ్డి కక్షపూరితంగా వ్యవహరించారని ఆరోపించారు. రెడ్డిలకు ఆరుసీట్లు, 50శాతం పైన ఉన్న బీసీలకు రెండు సీట్లు ఇచ్చారని అన్నారు. కేసీఆర్‌ నియంతృత్వంతో మాదిగలు నష్టపోయారని, అందుకే ఈ ఎన్నికల్లో బీఆర్‌ఎస్‌కు ఎవరూ ఓటు వేయద్దని సూచించారు. బీజేపీ తమ సమస్యలు పరిష్కరించేందుకు హామీ ఇచ్చిందని, ఈ ఎన్నికల్లో ఆ పార్టీకే మద్దతు ఇచ్చామని అన్నారు. నాయకులు రుద్రారపు రామచంద్రం, మారెపల్లి శ్రీనివాస్‌, తునికి వసంత్‌, వెంకట్‌ స్వామి, డాక్టర్‌ తడికమళ్ల శేఖర్‌, బొరగల సారయ్య, రాజు పాల్గొన్నారు. ఏజీని కలిసిన బార్‌ అసోసియేషన్‌ ప్రెసిడెంట్‌కరీంనగర్‌క్రైం: రాష్ట్ర హైకోర్టు అడ్వకేట్‌ జనరల్‌ బి.సుదర్శన్‌ రెడ్డిని కరీంనగర్‌ బార్‌ అసోసియేషన్‌ అధ్యక్షుడు పీవీ.రాజ్‌ కుమార్‌ సోమవారం మర్యాద పూర్వకంగా కలిసి బొకే అందజేశారు. న్యాయవాదులకు ప్రస్తుతం ఇస్తున్న రూ.2లక్షల ఇన్సూరెన్స్‌ను రూ.5లక్షలకు పెంచాలని, కొత్త సభ్యులకు హెల్త్‌కార్డులు ఇవ్వాలని, జూనియర్‌ న్యాయవాదులకు నెలకు రూ.5వేల స్టైఫండ్‌ ఇవ్వాలని వినతిపత్రం అందించగా.. సానుకూలంగా స్పందించారు. మున్సిపల్‌ కాంట్రాక్టర్ల సంఘం కన్వీనర్‌గా మహేందర్‌కరీంనగర్‌ కార్పొరేషన్‌: మున్సిపల్‌ కాంట్రాక్టర్ల సంక్షేమ సంఘం కన్వీనర్‌గా దగ్గు మహేందర్‌ రాకేశ్‌ ఏకగ్రీవంగా ఎన్నికయ్యారు. మహేందర్‌ కన్వీనర్‌గా ఎన్నికవడం వరుసగా ఇది రెండోసారి. కాంట్రాక్టర్లకు సంబంధించిన సమస్యలను అధికారుల సహకారంతో పరిష్కరిస్తానని ఈ సందర్భంగా మహేందర్‌ తెలిపారు. తన నియామకానికి సహకరించిన సహచర కాంట్రాక్టర్లకు కృతజ్ఞతలు తెలిపారు. సోమవారం మేయర్‌ యాదగిరి సునీల్‌రావును మహేందర్‌ రాకేశ్‌ ఆధ్వర్యంలో కాంట్రాక్టర్లు మర్యాదకపూర్వకంగా కలిశారు. మహేందర్‌కు మేయర్‌ శుభాకాంక్షలు తెలిపారు.

కరీంనగర్: అసెంబ్లీ ఎన్నికల్లో కాంగ్రెస్‌కు ఓటేసినందుకు ఇప్పుడు ప్రజలందరూ గోసపడుతున్నారని, ఇప్పుడు బీజేపీకి ఓటేస్తే ఆగమైతరని కరీంనగర్‌ బీఆర్‌ఎస్‌ ఎంపీ అభ్యర్థి బోయినపల్లి వినోద్‌కుమార్‌ అన్నారు. మల్యాలలో సోమవా రం రాత్రి రోడ్‌షో చేపట్టారు. చొప్పదండి మాజీ ఎమ్మెల్యే సుంకె రవిశంకర్‌ ఆధ్వర్యంలో బీఆర్‌ఎస్‌ నాయకులు ఘన స్వాగతం పలికారు. అంగడి బజార్‌లో వినోద్‌ మాట్లాడుతూ.. కరీంనగర్‌ ఎంపీగా బండి సంజయ్‌ బడి తేలే.. గుడి తేలేదని, ఐదేళ్లలో కనీసం ఐదు రూపాయలు తేలేదని ఎద్దేవా చేశారు. తెలంగాణకు 23 నవోదయ పాఠశాలలు రావాల్సి ఉండగా కేంద్ర ప్రభుత్వం ఒక్కటీ ఇవ్వలేదన్నారు. ఓట్ల కోసం బండి సంజయ్‌ వస్తే నిలదీయాలని పిలుపునిచ్చారు. ఎమ్మెల్యేగా ఓడిపోతే ఎంపీగా పోటీ చేసేందుకు కరీంనగర్‌ ఆయనకు పునరావాసమా..? అని ప్రశ్నించారు. తనను ఎంపీగా గెలిపిస్తే కరీంనగర్‌కు స్కిల్‌ డెవలప్‌మెంట్‌ సెంటర్‌ తీసుకొస్తానని హామీ ఇచ్చారు. కాంగ్రెస్‌ గారడీ మాటలు, మోసపూరిత హామీలు ఇచ్చి ప్రజలను మభ్యపెడుతోందని, నాలుగు నెలల్లోనే రాష్ట్రప్రభుత్వంపై ప్రజలు విసుగుచెందారని తెలిపారు. కరీంనగర్‌ ఎమ్మెల్యే గంగుల కమలాకర్‌ మాట్లాడుతూ తెలంగాణ ప్రాంత హక్కుల కోసం పార్లమెంట్‌లో ప్రశ్నించే గొంతుక కావాలని, ఇందుకు వినోద్‌కుమార్‌ను గెలిపించుకోవాలని కోరారు. ఇవి చదవండి: నేను.. పక్కా లోకల్‌

● సివిల్స్‌ ర్యాంకర్‌కు టీఎన్జీవో రాష్ట్ర అధ్యక్షుడు ‘మారం’ అభినందన కరీంనగర్‌ అర్బన్‌: సివిల్స్‌లో ర్యాంకు సాధించిన కొలనుపాక సహనకు అభినందనలు వెల్లువెత్తుతున్నాయి. శుక్రవారం టీఎన్జీవోల సంఘం జిల్లా అధ్యక్షుడు దారం శ్రీనివాస్‌రెడ్డి ఆధ్వర్యంలో నగరంలోని టీఎన్జీవో భవనంలో సన్మాన కార్యక్రమం నిర్వహించారు. ముఖ్య అతిథిగా హాజరైన టీఎన్జీవోల రాష్ట్ర అధ్యక్షుడు మారం జగదీశ్వర్‌ మాట్లాడుతూ.. ఇటీవల కాలంలో సివిల్స్‌లో కరీంనగర్‌ యువత సత్తా చాటుతోందని హర్షం వ్యక్తం చేశారు. సహన సివిల్స్‌లో ప్రతిభ చాటడం అభినందనీయమని కొనియాడారు. దారం శ్రీనివాస్‌రెడ్డి మాట్లాడుతూ సహన మంచి అధికారిగా సేవలందించి కరీంనగర్‌ పేరును చిరస్థాయిగా నిలపాలని ఆకాంక్షించారు. టీఎన్జీవోల జిల్లా కార్యదర్శి సంఘం లక్ష్మణరావు, నాగుల నరసింహస్వామి, అసోసియేట్‌ అధ్యక్షుడు రాగి శ్రీనివాస్‌, జిల్లా కోశాధికారి కిరణ్‌ కుమార్‌రెడ్డి, మహిళా జేఏసీ చైర్‌పర్సన్‌ ఇరుమల్ల శారద, సబిత, సునీత, శైలజ, సుస్మిత, అర్బన్‌ అధ్యక్షుడు సర్దార్‌ హర్మిందర్‌ సింగ్‌, రూరల్‌ అధ్యక్షుడు మారుపాక రాజేశ్‌ భరద్వాజ్‌, కార్యదర్శి వెలిచాల సుమంతరావు, జిల్లా నాయకులు పాల్గొన్నారు.

● వినోద్‌ను ఓడించింది వాళ్లే ● ఇద్దరూ కలిసే నగరాన్ని దోచుకున్నారు ● తీగలవంతెనపై విచారణ జరుగుతోంది ● మంత్రి పొన్నం ప్రభాకర్‌ కరీంనగర్‌ కార్పొరేషన్‌: కరీంనగర్‌ ఎంపీ బండి సంజయ్‌, ఎమ్మెల్యే గంగుల కమలాకర్‌ ఒక్కటేనని, ఇద్దరు కలిసి నగరాన్ని దోచుకున్నారని బీసీ సంక్షేమ, రవాణాశాఖ మంత్రి పొన్నం ప్రభాకర్‌ ధ్వజమెత్తారు. నగరంలోని అంబేడ్కర్‌ స్టేడియంలో శుక్రవారం ఉదయం మంత్రి మార్నింగ్‌ వాక్‌ చేశారు. ఈ సందర్భంగా మీడియాతో మాట్లాడుతూ ఉప్పు నిప్పులా ఉన్న గంగుల, బండి పాలు నీళ్లలా ఎందుకు కలిసిపోయారో ప్రజలు అర్థం చేసుకోవాలన్నారు. గత ఎంపీ ఎన్నికల్లో ఇద్దరు కలిసి వినోద్‌కుమార్‌ను ఓడించారన్నారు. నగరంలో భూ కబ్జాలపై స్థానిక ఎంపీగా సంజయ్‌ ఎందుకు మాట్లాడడంలేదన్నారు. స్మార్ట్‌సిటీ, గ్రానైట్‌ అక్రమాలపై ప్రశ్నించాల్సిన ఎంపీ ఎందుకు మౌనంగా ఉన్నాడని, ఎంపీ విధానాలను నిలదీయాల్సిన ఎమ్మెల్యే ఎందుకు ప్రశ్నించడం లేదన్నారు. ఎన్నిలకు ముందు సంజయ్‌ ఆస్కార్‌అవార్డు స్థాయిలో నటిస్తారని, ఒకసారి భార్య తాళి అమ్ముకున్నానని, మరోసారి ఎంఐఎం దాడి చేసిందని, ఇంకోసారి మూర్చవచ్చి పడిపోతాడన్నారు. నగరాన్ని లండన్‌ చేస్తాం, అద్ధంలా మారుస్తామని కేసీఆర్‌ చెప్పారని ఏమైందన్నారు. తీగలవంతెన నిర్మాణ అక్రమాలపై విచారణ జరుగుతోందని, తప్పు చేసిన వాళ్లు లోపలికి పోవుడేనన్నారు. తాము అధికారంలోకి రాగానే భూ ఆక్రమణలపై చర్యలు తీసుకుంటామని చెప్పి చేసి చూపిస్తున్నామని, అదే కాంగ్రెస్‌ పాలన అని చెప్పారు. భూ కబ్జాల్లో ఎవరు జైలుకు వెళ్తున్నారో ప్రజలు చూస్తున్నారన్నారు. ఏ పార్టీ వాళ్లయినా భూ ఆక్రమణలకు పాల్పడితే వాపసు ఇవ్వాలని, లేదంటే చర్యలు తప్పవని హెచ్చరించారు. ఎన్నికల కోడ్‌ ముగిశాక నగరంలో పెండింగ్‌ పనులు పూర్తి చేస్తామని హామీ ఇచ్చారు. డీసీసీ అధ్యక్షుడు, మానకొండూరు ఎమ్మెల్యే కవ్వంపల్లి సత్యనారాయణ, మాజీ ఎమ్మెల్యే ఆరెపల్లి మోహన్‌, నాయకులు వెలిచాల రాజేందర్‌రావు, వైద్యుల అంజన్‌కుమార్‌ తదితరులు పాల్గొన్నారు.

జగిత్యాలక్రైం: జగిత్యాలతోపాటు, వివిధ ప్రాంతాల్లో వరుస దొంగతనాలకు పాల్పడుతున్న ఇద్దరు నిందితులను అరెస్ట్‌ చేసినట్లు డీఎస్పీ రఘుచందర్‌ తెలిపారు. పట్టణ పోలీస్‌స్టేషన్‌లో వివరాలు వెల్లడించారు. కోరుట్లలోని అల్లమయ్య గుట్ట ప్రాంతానికి చెందిన విబూది శేఖర్‌, బుగ్గారం మండలం బీర్సానికి చెందిన గుమ్ముల వెంకటేశ్‌ కొద్దికాలంగా జిల్లాలోని వివిధ ప్రాంతాల్లో దొంగతనాలకు పాల్పడుతున్నారు. బాధితుల ఫిర్యాదుతో పోలీసులు కేసు దర్యాప్తు చేస్తున్నారు. ఈ క్రమంలో గురువారం సాయంత్రం జగిత్యాల చిన్న కెనాల్‌ వద్ద పట్టణ పోలీసులు వాహనాల తనిఖీ చేపడుతుండగా.. నిందితులిద్దరూ పోలీసులను చూసి పారిపోయేందుకు ప్రయత్నించారు. పోలీసులు వారిని చాకచక్యంగా పట్టుకున్నారు. విబూది శేఖర్‌ నుంచి రూ.55,700, వెంకటేశ్‌ నుంచి రూ.11 వేలు, 8తులాల వెండిని స్వాధీనం చేసుకున్నారు. శేఖర్‌ కొద్దికాలంగా ఆలయాల్లోని హుండీలను పగులగొట్టి బంగారు ఆభరణాలు దొంగిలించి విక్రయిస్తూ జల్సాలు చేస్తున్నాడు. ఇతడిపై ఇప్పటికే 10 కేసులు ఉన్నాయి. గతంలో జైలుకు కూడా వెళ్లిళ్లివచ్చాడు. సమావేశంలో పట్టణ సీఐ వేణుగోపాల్‌, ఎస్సైలు నరేశ్‌, మన్మథరావు, ఏఎస్సై వేణురావు, కానిస్టేబుళ్లు జీవన్‌, విశాల్‌ పాల్గొన్నారు.

బోయినపల్లి(చొప్పదండి): ఎండలు దంచి కొడుతున్నాయి. చెరువులు, కుంటల్లో నీరు వెడెక్కుతోంది. ఎండల ధాటికి చెరువుల్లోని చేపపిల్లలు చనిపోతున్నాయి. ఇటీవల వేములవాడరూరల్‌ మండలం మర్రిపల్లి, తంగళ్లపల్లి మండలం మండేపల్లి చెరువుల్లో భారీగా చేపలు చనిపోయాయి. వేడిమికి నీటిలో కరిగి ఉన్న ప్రాణవాయువు(ఆక్సిజన్‌) తగ్గి పోతోంది. 43 నుంచి 45 డిగ్రీల వరకు నమోదవుతున్న ఉష్ణోగ్రతలతో విపరీతమైన ఉష్ణోగ్రతలకు నీళ్లలో ఉన్న చేపలు ప్రాణాలు కోల్పోతున్నాయి. జిల్లాలో 440 చెరువులు, రెండు ప్రాజెక్టులు జిల్లాలోని 13 మండలాల్లో 440 చెరువులు, కుంటలు ఉన్నాయి. బోయినపల్లి మండలం మాన్వాడలో మిడ్‌మానేరు ప్రాజెక్టు, గంభీరావుపేట మండలంలో ఎగువమానేరు ప్రాజెక్టులు ఉన్నాయి. సముద్రలింగాపూర్‌లో సింగసముద్రం చెరువు, వేములవాడ, విలాసాగర్‌ లార్జ్‌ ట్యాంకులు ఉన్నాయి. గత వర్షాకాలం సీజన్‌లో జిల్లాలోని 440 చెరువుల్లో 1.40 కోట్ల మేర చేపపిల్లలను వదిలినట్లు జిల్లా మత్స్యశాఖ అధికారి శివప్రసాద్‌ తెలిపారు. ఇందులో మిడ్‌మానేరు ప్రాజెక్టులో 28 లక్షలు, ఎగువ మానేరు ప్రాజెక్టులో 11 లక్షల చేపపిల్లలు వేశారు. 8 వేల మంది మత్స్యకారులు జిల్లాలో చేపల పెంపకం ద్వారా 8,400 మంది మత్స్యకార్మికులు ఉపాధి పొందుతున్నట్లు అధికారులు తెలిపారు. జిల్లాలో 135 మత్స్య పారిశ్రామిక సహకారా సంఘాలు, వేములవాడలో మహిళా మత్స్యపారిశ్రామిక సహకార సంఘం, ఎగువమానేరులో మత్స్య మార్కెటింగ్‌ సొసైటి ఉంది. మత్స్య కార్మికులు చేపలు పట్టడం ద్వారా జీవనోపాధి పొందుతున్నారు. గతేడాది 6వేల టన్నుల చేపల దిగుబడి మిడ్‌మానేరు, ఎగువమానేరు ప్రాజెక్టులు, 440 చెరువుల్లో కలుపుకుని గతేడాది ఆరు వేల టన్నుల మేర చేపల దిగుబడి వచ్చినట్లు అధికారులు తెలిపారు. మిడ్‌మానేరు ప్రాజెక్టు పరిసరాల్లో నిత్యం సుమారు 1 నుంచి 2 టన్నుల మేర చేపల దిగుబడి వస్తున్నట్లు పేర్కొంటున్నారు. ఎండకు విలవిల చెరువుల్లో సలసలా కాగుతున్న నీళ్లలో ప్రాణవాయువు కరిగి పోతుంటే అందులోని చేపలు చనిపోయే ప్రమాదం ఉంది. ఈక్రమంలో చేపల వృత్తితో జీవనోపాధి పొందుతున్న పలువురు మత్స్యకారులు కష్టాలకోర్చి చేపలు పడుతున్నారు. మిడ్‌మానేరు పరిసరాల్లో తెప్పే ఆధారంగా విసురుడు వలతో ఎండ తగలకుండా చేపలు పడుతున్నారు. ఎండలతో చేపల దిగుబడి తగ్గుతుందని ఆవేదన వ్యక్తం చేస్తున్నారు. పెరుగుతున్న ఉష్ణోగ్రతలతో చనిపోతున్న చేపలు చెరువులు, కుంటల్లో అడుగంటిన జలాలు అత్యధిక ఉష్ణోగ్రతలకు ఆవిరి అవుతున్న నీరుజిల్లాలో చేపల పెంపకం వివరాలు ప్రాజెక్టులు : మిడ్‌మానేరు, ఎగువ మానేరు చెరువులు, కుంటలు : 440 వేసిన చేపపిల్లలు : 1.40 కోట్లు మత్స్యకార్మికులు : 8,400 మత్స్య పారిశ్రామిక సహకార సంఘాలు : 135

ఎల్లారెడ్డిపేట(సిరిసిల్ల): బుడి..బుడి నడకలతో అల్లరిచేసే కొడుకు మంచానికే పరిమితం కావడంతో ఆ తల్లిదండ్రుల హృదయాలు తల్లడిల్లుతున్నాయి. మూడేళ్ల వయస్సులోనే ఆ చిన్నారి బోన్‌మ్యారోతో బాధపడుతుండడంతో ఓ కార్పొరేట్‌ ఆస్పత్రిలో చేర్పించారు. ఆర్థిక పరిస్థితి అంతంతే ఉన్న వారికి రూ.25లక్షలు ఖర్చు చేస్తేనే కొడుకు బతుకుతాడన్న వైద్యుల మాటలతో నిశ్చేష్టులయ్యారు. దాతలు స్పందించి తమ కొడుకు చికిత్సకు సాయం చేయాలని వేడుకుంటున్నారు. ఎల్లారెడ్డిపేట మండలం రాచర్లగొల్లపల్లికి చెందిన అందెమాసుల సంధ్య–రాజు దంపతుల కుమారుడు జిస్మిత్‌(3) ఇటీవల అనారోగ్యానికి గురయ్యాడు. సిరిసిల్ల ఏరియా ఆస్పత్రికి తరలించి వైద్యం అందించినా ఆరోగ్యం కుదుట పడలేదు. వైద్యుల సూచనలతో హైదరాబాద్‌లోని కిమ్స్‌ ఆస్పత్రికి తరలించారు. అక్కడ పరీక్షించిన వైద్యులు బాలుడు బోన్‌మ్యారోకు సంబంధించిన వ్యాధితో బాధపడుతున్నట్లు గుర్తించారు. బాలుడిని అక్కడే అడ్మిట్‌ చేసుకొని వెంటనే ‘బోన్‌మ్యారో ట్రాన్స్‌ప్లాంటేషన్‌’ శస్త్రచికిత్స చేయాలని సూచించారు. అందుకు రూ.26 లక్షలు ఖర్చు అవుతుందని తెలిపారు. బాలుడిని ఆస్పత్రిలోనే ఉంచిన దంపతులు చేతిలో చిల్లిగవ్వ లేక దిక్కులు చూస్తున్నారు. దాతలు స్పందించి తమ కొడుకుకు ప్రాణభిక్ష పెట్టాలని వేడుకుంటున్నారు.87906 36095లో ఫోన్‌పే, గూగుల్‌ పే చేయాలని కోరుతున్నారు. బోన్‌మ్యారోతో బాధపడుతున్న చిన్నారి దాతలు ఆదుకోవాలని తల్లిదండ్రుల వేడుకోలు హైదరాబాద్‌ కిమ్స్‌లో చికిత్స శస్త్రచికిత్సకు రూ.26లక్షలు అవసరం

వేములవాడ: వేములవాడ రాజన్నకు 21 రోజుల్లో హుండీల ద్వారా రూ.1,52,15,575 నగదుతోపాటు బంగారం 218 గ్రాములు, వెండి 11.500 కిలోలు సమకూరినట్లు ఆలయ ఈవో కృష్ణప్రసాద్‌ తెలిపారు. కట్టుదిట్టమైన భద్రత, సీసీ కెమెరాల నిఘా మధ్య గురువారం హుండీ లెక్కింపు కొనసాగింది. కరీంనగర్‌ ఏసీ కార్యాలయం పరిశీలకులు సత్యనారాయణ, ఏఈవో హరికిషన్‌, జయకుమారి, బి.శ్రీనివాస్‌, ప్రతాప నవీన్‌, ఆలయ ఉద్యోగులతోపాటు రాజరాజేశ్వర సేవాసమితి సభ్యులు పాల్గొన్నారు. తానా రాష్ట్ర ఉపాధ్యక్షుడిగా డాక్టర్‌ ఎలగందుల శ్రీనివాస్‌ కరీంనగర్‌టౌన్‌: తెలంగాణ హాస్పిటల్స్‌ అండ్‌ నర్సింగ్‌ హోమ్స్‌ అసోసియేషన్‌ (తానా) 2024–25 సంవత్సరానికి జరిగిన కార్యవర్గ ఎన్నికల్లో తెలంగాణ జోన్‌–2 నుంచి ఉపాధ్యక్షుడిగా నగరంలోని డాక్టర్‌ ఎలగందుల శ్రీనివాస్‌ ఏకగ్రీవంగా ఎన్నికయ్యారు. ఈ సందర్భంగా శ్రీనివాస్‌ మాట్లాడుతూ... కొత్త జిల్లాల్లో తానా నూతన బ్రాంచ్‌లను ఏర్పాటు చేయడానికి తన వంతు కృషి చేస్తానని అలాగే ప్రైవేట్‌ హాస్పిటల్స్‌ ఎదుర్కొంటున్న వివిధ సమస్యల పరిష్కారానికి కృషి చేస్తానని తెలిపారు. కాగా శ్రీనివాస్‌ ఎన్నిక పట్ల పలువురు హర్షం వ్యక్తం చేశారు. హైదరాబాద్‌ తరహాలో కంటి వైద్య సేవలు కరీంనగర్‌టౌన్‌: కరీంనగర్‌ రేకుర్తి కంటి ఆస్పత్రిలో హైదరాబాద్‌ తరహా వైద్యసేవలు అందిస్తున్నామని డాక్టర్‌ మాడేకర్‌ ఉదార నేత్ర వైద్యశాల చైర్మన్‌ లయన్‌ కొండ వేణుమూర్తి అన్నారు. గురువారం లయన్స్‌క్లబ్‌ ఆఫ్‌ కరీంనగర్‌ ఆధ్వర్యంలో రెటీనా చికిత్స శిబిరాన్ని నిర్వహించారు. శిబిరాన్ని ప్రారంభించిన వేణుమూర్తి మాట్లాడుతూ.. ఉత్తర తెలంగాణలోనే అత్యంత ప్రాముఖ్యత కలిగిన రేకుర్తి కంటి ఆసుపత్రిలో ప్రత్యేక వైద్యులతో రెటీనా చికిత్స అందించడం జరుగుతోందన్నారు. ప్రతీ ఆరునెలలకు ఒకసారి పరీక్ష చేయించుకోవాలని అన్నారు. మధుమేహం, బీపీ ఉన్నవారి తప్పనిసరిగా కంటి పరీక్షలు చేయించుకోవాలని సూచించారు. రెటీనా చికిత్సకు విశేష స్పందన లభించినట్లు తెలిపారు. దుబాయ్‌లో బాలపల్లి యువకుడి ఆత్మహత్య జగిత్యాలరూరల్‌: జగిత్యాలరూరల్‌ మండలం బాలపల్లికి చెందిన బైరి రంజిత్‌కుమార్‌ (34) నాలుగు రోజుల క్రితం దుబాయ్‌లో ఉరేసుకుని ఆత్మహత్య చేసుకున్నట్లు ఇక్కడి కుటుంబసభ్యులకు సమాచారం అందింది. దీంతో వారు తీవ్రంగా రోదిస్తున్నారు. రంజిత్‌కుమార్‌ మృతదేహాన్ని స్వదేశానికి రప్పించేందుకు దుబాయ్‌లో ఉన్న మిత్రులు ప్రయత్నాలు కొనసాగిస్తున్నట్లు సమాచారం. రంజిత్‌కు భార్య, కుమారుడు, కూతురు సంతానం. రంజిత్‌ది నిరుపేద కుటుంబమని, ప్రభుత్వం ఆదుకోవాలని గ్రామస్తులు కోరుతున్నారు.

రామగుండం: కరీంనగర్‌ నుంచి గోదావరిఖని వైపు ఉనుక లోడుతో వెళ్తున్న లారీ మల్యాలపల్లి సబ్‌స్టేషన్‌ దాటిన తర్వాత మూలమలుపు వద్ద అదుపుతప్పి బోల్తా పడింది. సమాచారం తెలుసుకున్న రామగుండం ఎస్సై సతీశ్‌ ఘటనా స్థలికి చేరుకొని లారీ క్యాబిన్‌లో ఇరుక్కున్న డ్రైవర్‌ వేముల రాంబాబును టోల్‌ప్లాజాకు చెందిన పొక్లెయిన్‌ సాయంతో సిబ్బంది శ్రమించి బయటకు తీశారు. క్షతగాత్రుడికి 108 సిబ్బంది ప్రాథమిక చికిత్స అందించి గోదావరిఖని ప్రభుత్వాసుపత్రికి తరలించారు. కాగా డ్రైవర్‌ రాంబాబును జగ్గయ్యపేట, చిలకల్లు గ్రామం, కృష్ణ జిల్లాకు చెందిన వ్యక్తిగా గుర్తించారు. కేసు దర్యాప్తు చేస్తున్నట్లు ఎస్సై పేర్కొన్నారు. ఎమ్మెల్యే పాడి కౌశిక్‌రెడ్డిపై కేసుజమ్మికుంట: ప్రజలను రెచ్చగొట్టేలా సోషల్‌మీడియాలో వీడియో విడుదల చేసినందుకు హుజూరాబాద్‌ బీఆర్‌ఎస్‌ ఎమ్మెల్యే పాడి కౌశి క్‌రెడ్డిపై గురువారం కేసు నమోదు చేసినట్లు జమ్మికుంట టౌన్‌ సీఐ రవి తెలిపారు. గతనెల 29న ఎమ్మెల్యే కౌశిక్‌రెడ్డి ఓ వీడియో విడుదల చేస్తూ.. అందులో ‘నాడు సుభిక్షం– నేడు సంక్షోభం’ అంటూ మాట్లాడారు. 30న జరిగిన ముఖ్యమంత్రి సభలో రైతుబీమా, మ హాలక్ష్మి, దళిత బంధు, భరోసా, అడబిడ్డలకు తులం బంగారం, మత్స్యకారుల సమస్యలు, నేతన్నవస్త్రాల విక్రయం, మద్దతు ధర పథకా లపై ప్రజలు ప్రశ్నించాలని వీడియో విదుల చేశారు. వీడియో ప్రజలను రెచ్చగొట్టేలా, శాంతి భద్రతలకు భంగం కలిగేలా ఉందని, కౌశిక్‌రెడ్డిపై చట్టపరమైన చర్యలు తీసుకోవాలని జమ్మికుంట బ్లాక్‌ కాంగ్రెస్‌ అధ్యక్షుడు మొలుగూరి సదయ్య ఫిర్యాదు మేరకు కేసు నమోదు చేసినట్లు సీఐ వివరించారు. వ్యభిచార ముఠా అరెస్ట్‌జగిత్యాలక్రైం: జిల్లా కేంద్రంలోని బైపాస్‌రోడ్‌ దేవిశ్రీ గార్డెన్స్‌ సమీపంలో వ్యభిచారం నిర్వహిస్తున్న ముఠాను పోలీసులు గురువారం రా త్రి అరెస్ట్‌ చేశారు. వ్యభిచారం నిర్వహిస్తున్న ఇద్దరు కోదాడకు చెందిన మహిళలతోపాటు, ఓ విఠుడిని పట్టుకుని కేసు నమోదు చేసినట్లు పట్టణ పోలీసులు తెలిపారు.