TV
రెండు మనుసుల కలయికతో.. ఇద్దరు మనుషులు పరస్పర నమ్మకంతో దాంపత్య జీవితంలో ముందుకు సాగితేనే ఆ బంధం నాలుగుకాలాల పాటు వర్ధిల్లుతుంది.
భాగస్వాములలో ఏ ఒక్కరు పెళ్లినాటి ప్రమాణాలు తప్పినా ఆ బంధం విచ్ఛిన్నమవుతుంది.
ముఖ్యంగా ‘మూడో వ్యక్తి’ని తమ జీవితంలోకి ఆహ్వానించి ప్రాణంగా ప్రేమించి పెళ్లాడిన వారిని మోసం చేస్తే అంతకంటే ద్రోహం మరొకటి ఉండదు.
టీమిండియా వికెట్‌ కీపర్‌ బ్యాటర్‌ దినేశ్‌ కార్తిక్‌ ఒకప్పుడు ఈ దుస్థితిని ఎదుర్కొన్నాడు.
తమిళనాడుకు చెందిన డీకే.. తన చిన్ననాటి స్నేహితురాలైన నికిత వంజారాను ప్రేమించి పెళ్లాడాడు.
డీకే సహచర క్రికెటర్‌, స్నేహితుడు అయిన మురళీ విజయ్‌ తరచుగా వాళ్లింటికి వచ్చేవాడు.
ఈ క్రమంలో నికితా- విజయ్‌ మధ్య సాన్నిహిత్యం పెరిగింది.
వారిద్దరి రహస్యంగా రిలేషన్‌షిప్‌లో ఉండటం తెలిసిన దినేశ్‌ హృదయం ముక్కలైంది.
దీంతో డీకే 2012లో నికితాకు విడాకులు ఇచ్చాడు.
ఆ తర్వాత నికిత ఎంచక్కా మురళీ విజయ్‌ను పెళ్లి చేసుకుని సెటిల్‌ అయింది.
మరోవైపు.. స్వ్యాష్‌ ప్లేయర్‌ దీపికా పళ్లికల్‌ రూపంలో డీకే జీవితంలోనూ తిరిగి వసంతాలు పూశాయి.
దీపిక ద్వారా నిజమైన ప్రేమను పొందిన డీకే ఆమెను వివాహమాడాడు.
ఈ జంటకు ప్రస్తుతం కవలలు(ఇద్దరు కుమారులు) సంతానం.
దీపికా పళ్లికల్‌ 2014 కామన్‌వెల్త్‌ గేమ్స్‌లో జోష్న చిన్నప్పతో కలిసి స్క్వాష్‌ మహిళల డబుల్స్‌ పసిడి పతకం గెలిచింది.
అదే విధంగా.. 2023 ఆసియా క్రీడల్లో హరిందర్‌ పాల్‌ సింగ్‌తో కలిసి దీపికా మిక్స్‌డ్‌ పెయిర్‌ విభాగంలో స్వర్ణం సాధించింది.
ఐపీఎల్‌-2008 నుంచి 2024 దాకా పదిహేడేళ్ల పాటు ఐపీఎల్‌లో కొనసాగిన డీకే... మే 22న ఐపీఎల్‌కు రిటైర్మెంట్‌ ప్రకటించాడు.
ఎలిమినేటర్‌ మ్యాచ్‌లో భాగంగా రాజస్తాన్‌ రాయల్స్‌తో మ్యాచ్‌లో రాయల్‌ చాలెంజర్స్‌ బెంగళూరు ఓడిపోయిన తర్వాత తన నిర్ణయాన్ని వెల్లడించాడు.
కాగా ఐపీఎల్‌లో ఢిల్లీ, పంజాబ్‌, ముంబై, ఆర్సీబీ, కోల్‌కతా నైట్‌ రైడర్స్‌, గుజరాత్‌ లయన్స్‌ తదితర జట్లకు డీకే ప్రాతినిథ్యం వహించాడు. 2022 నుంచి ఆర్సీబీలో ఉన్న అతడు అక్కడే రిటైర్‌ అయ్యాడు.
