మాచారెడ్డి: ప్రమాదవశాత్తు చెరువులో పడి ఓ యువకుడు మృతి చెందిన ఘటన మండల కేంద్రంలో శుక్రవారం చోటు చేసుకుంది. ఏఎస్సై రామేశ్వర్‌రెడ్డి తెలిపిన వివరాల ప్రకారం.. మండలంలోని గజ్జనాయక్‌ తండాకు చెందిన లక్ష్మణ్‌(36) గురువారం బహిర్భూమికని వెళ్లి తిరిగి రాలేదు. కుటుంబీకులు పలు చోట్ల గాలించినా ఆచూకీ లభించలేదు. మండల కేంద్రంలోని ఊర చెరువులో మృతదేహం కనిపించడంతో స్థానికులు పోలీసులకు సమాచారం అందించారు. కుటుంబీకుల ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై పేర్కొన్నారు. ఆర్థిక ఇబ్బందులతో వివాహిత..ఎడపల్లి: ఆర్థిక ఇబ్బందులతో ఓ వివాహిత ఆత్మహత్య చేసుకున్న ఘటన మండలంలోని మంగళ్‌పాడ్‌లో శుక్రవారం చోటు చేసుకుంది. ఎస్సై వంశీచందర్‌రెడ్డి తెలిపిన వివరాల ప్రకారం.. గ్రామానికి చెందిన పోలెపల్లి ఇంద్రజ(48)కు ముగ్గురు సంతానం. వీరు ఇటీవల ఇంటి నిర్మాణం చేపట్టడంతో ఆర్థిక ఇబ్బందులు ఎదుర్కొంటున్నారు. దీంతక్రుదయం ఉపాధి హామీ పనులకు వెళ్లిన ఇంద్రజ చెరువులో దూకి ఆత్మహత్య చేసుకుంది. మృతదేహాన్ని పోస్టుమార్టం నిమిత్తం ప్రభుత్వ ఆస్పత్రికి తరలించి, కుటుంబీకుల ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఎస్సై పేర్కొన్నారు.

రుద్రూర్‌: బోధన్‌–బీదర్‌ రైల్వే లైన్‌ ఏర్పాటుకు కృషి చేస్తానని జహీరాబాద్‌ కాంగ్రెస్‌ ఎంపీ అభ్యర్థి సురేశ్‌ షెట్కార్‌ అన్నారు. చందూర్‌, వర్ని, కోటగిరి మండల కేంద్రాల్లో పార్టీ కార్యకర్తలతో కలిసి శుక్రవారం నిర్వహించిన పార్లమెంటరీ సన్నాహక సమావేశంలో ఆయన మాట్లాడారు. తాను ఎంపీగా ఉన్నప్పుడు బోధన్‌–బీదర్‌ రైల్వే లైన్‌ సర్వే చేయించి ఎస్టీమెట్‌ వేయించానని, ఆ తర్వాత ఎంపీగా వచ్చిన బీబీ పాటిల్‌ దాని గురించి పట్టించుకోలేదన్నారు. సీఎం రేవంత్‌రెడ్డి, రాష్ట్ర ప్రభుత్వ సహకారంతో బోధన్‌ ఎన్‌ఎస్‌ఎఫ్‌ ఫ్యాక్టరీని తెరిపిస్తామన్నారు. ఎంపీ ఎన్నికల్లో కాంగ్రెస్‌ను గెలిపించాలని కోరారు. కార్యక్రమాల్లో పార్టీ బాన్సువాడ సెగ్మెంట్‌ ఇన్‌చార్జి ఏనుగు రవీందర్‌ రెడ్డి, బ్లాక్‌ కాంగ్రెస్‌ అధ్యక్షుడు ఇందూర్‌ చంద్రశేఖర్‌, పార్టీ మండలాల అధ్యక్షులు తోట అరుణ్‌కుమార్‌, సురేశ్‌బాబా, పుప్పాల శంకర్‌, షాహీద్‌, నాయకులు పాల్గొన్నారు. జహీరాబాద్‌ కాంగ్రెస్‌ ఎంపీ అభ్యర్థి సురేశ్‌ షెట్కార్‌

రెంజల్‌: పూడ్చిపెట్టిన మృతదేహానికి కొల్లూర్‌ పోలీసులు పోస్టుమార్టం నిర్వహించిన ఘటన మండలంలోని సాటాపూర్‌లో శుక్రవారం చోటు చేసుకుంది. స్థానికులు తెలిపిన వివరాల ప్రకారం.. గ్రామానికి చెందిన గీరయ్య(48) బతుకుదెరువు కోసం హైదరాబాద్‌కు వలస వెళ్లాడు. అక్కడ భవన నిర్మా ణ కార్మికుడిగా పనిచేస్తుండగా ప్రమాదవశాత్తు పనిచేస్తున్న ప్రదేశంలో భవనంపై నుంచి కిందపడ్డాడు. ఈ ఘటనపై సైబరాబద్‌ కమిషనరేట్‌ పరిధిలోని కొల్లూర్‌ పీఎస్‌లో కేసు నమోదైంది. గాయపడిన గీరయ్యను కుటుంబీకులు గ్రామానికి తీసుకొచ్చి వైద్య చికిత్సలు అందించారు. ఇంటి వద్ద చికిత్స పొందుతూ 15 రోజుల క్రితం మృతిచెందాడు. కుటుంబీకులు మృతదేహానికి అంత్యక్రియలు నిర్వహించారు. విషయం తెలుసుకున్న కొల్లూర్‌ పోలీసులు శుక్రవారం గ్రామానికి చేరుకొని కేసు విషయమై పూడ్చిపెట్టిన మృతదేహానికి డాక్లర్లు, ఫోరెన్సిక్‌ నిపుణులతో పోస్టుమార్టం నిర్వహించారు.

ఖలీల్‌వాడి: బంగారు ఆభరణాలు దొంగిలించిన ఘటనలో ముగ్గురికి జైలు శిక్షను విధించినట్లు జిల్లా జడ్జి సునీత కుంచాల శుక్రవారం తెలిపారు. వివరాలు ఇలా ఉన్నాయి. డిచ్‌పల్లి మండలం సుద్దులంకు చెందిన నీరడి అరుణ్‌, నీరడి రాజమణి, రెంజల్‌ మండలం కుర్నాపల్లికి చెందిన కొండపల్లి సావిత్రి, కోటగిరి మండలం కల్లూరుకు చెందిన సాయిలు 2022 మే 8న నగరంలోని గౌతంనగర్‌లో ఉన్న బోయిని పోచమ్మ ఇంటికి వెళ్లి ఇల్లు అద్దెకు కావాలని ఇంట్లోకి ప్రవేశించారు. వీరు పోచమ్మపై ఉన్న బంగారు ఆభరణాలను దొంగిలించి గొంతు నులిమి హత్య చేశారు. నిందితులపై సీఐ సత్యనారాయణ కేసు నమోదు చేశారు. విచారణలో అరుణ్‌, సాయిలు, రాజమణి దొంగతనం చేసినట్లు రుజువు కావడంతో వీరికి ఐదేళ్ల కఠిన కారాగార శిక్షతో పాటు దొంగసొత్తు కలిగి ఉన్నందున మరో రెండేళ్ల కఠిన కారాగార శిక్షతో పాటు రూ. వేయి జరిమానా విధించారు. ఈ రెండు శిక్షలు ఏకకాలంలో అనుభవించాలని జడ్జి తీర్పులో పేర్కొన్నారు. కాగా పోచమ్మ పోస్టుమార్టంలో సహజ గుండెజబ్బుతో మృతి చెందినట్లు రిపోర్టు రావడంతో నిందితులపై హత్య నేరం కాకుండా దొంగతనం, దొంగసొత్తు కలిగి ఉన్నందున కేసు నమోదు చేసి శిక్షను విధించినట్లు జడ్జి పేర్కొన్నారు.

బాన్సువాడ రూరల్‌: బంధువుల విందుకు హాజరైన ఓ మహిళను మృత్యువు కబళించింది. కిరాణ దుకాణంలో పూజకు అవసరమయ్యే సామగ్రిని కొనుగోలు చేసి రోడ్డు దాటుతున్న క్రమంలో అతివేగంగా వస్తున్న వాహనం సదరు మహిళను ఢీకొనడంతో అక్కడికక్కడే మృతి చెందిన ఘటన బాన్సువాడ మండలం తాడ్కోల్‌లో చోటు చేసుకుంది. సీఐ మున్నూరు కృష్ణ తెలిపిన వివరాల ప్రకారం.. పిట్లం మండలం కుర్తి గ్రామానికి చెందిన పోతరాజు గంగవ్వ(60) బాన్సువాడ మండలంలోని తాడ్కోలో తమ బంధువులు నిర్వహించిన కందూరు విందుకు శుక్రవారం హాజరైంది. పెద్దదేవుని దర్గాలో పూజకు అవసరమయ్యే సామగ్రిని కొనుగోలు చేసి రోడ్డు దాటుతున్న క్రమంలో బాన్సువాడ వైపు వేగంగా వెళ్తున్న తుఫాను వాహనం ఢీకొన్నది. ఈ ఘటనలో గంగవ్వ అక్కడికక్కడే మృతి చెందింది. మృతురాలి తమ్ముడు సాయిలు ఫిర్యాదుతో కేసు నమోదు చేసి దర్యాప్తు చేస్తున్నట్లు సీఐ పేర్కొన్నారు.

నిజామాబాద్‌నాగారం: ప్రభుత్వం పేదల కోసం రూ.1కే నల్లా కనెక్షన్‌ పథకం అందిస్తుండగా, అధికారుల నిర్లక్ష్యం కారణంగా పక్కదారి పడుతోంది. నగరంలోని వ్యాపార వాణిజ్య సంస్థల్లోనూ రూ.1 నల్లా కనెక్షన్లు ఇవ్వడంతో మున్సిపల్‌ ఆదాయానికి గండిపడుతోంది. అధికారులు అక్రమంగా నల్లా కనెక్షన్లు అందిస్తూ, తమ జేబులు నింపుకుంటున్నట్లు పలువురు ఆరోపిస్తున్నారు. ఇది పరిస్థితి.. నగరంలో 60 డివిజన్లు ఉండగా అధికారికంగా మంచినీటి కుళాయి కనెక్షన్లు 25వేలు ఉన్నాయి. అనధికారికంగా మరో 20వేల కనెక్షన్ల వరకు ఉన్నట్లు తెలుస్తోంది. ప్రభుత్వ ఆదేశాల మేరకు పేదలకు తెల్లరేషన్‌కార్డు ఉన్న వారికి 1 రూపాయికే నల్ల కనెక్షన్‌ ఇవ్వాలి. తెల్ల రేషన్‌కార్డు లేకుంటే రూ. 7వేల ఫీజు వసూలు చేయాలి. అలాగే కమర్షియల్‌ అయితే (వ్యాపార వాణిజ్య సంస్థలు) రూ. 50వేల నుంచి రూ. 1లక్షా 50వేలకు పైగా ఫీజుతో పాటు అదనపు ఫీజులు చెల్లించాల్సి ఉంటుంది. కానీ కొంతమంది ఇంజనీరింగ్‌ సెక్షన్‌లో అధికారులు, సిబ్బంది కొన్నేళ్లుగా గృహాలకు ఇచ్చే అనుమతి కాస్త కమర్షియల్‌ వాటిని ఇస్తూ, తమ జేబులు నింపుకుంటున్నారనే ఆరోపణలు వెల్లువెత్తుతున్నాయి. దీంతో నగరంలో అక్రమ కనెక్షన్లు పెరిగిపోతూనే ఉన్నాయి. అయినా పర్యవేక్షణ చేయాల్సిన పైస్థాయి అధికారులు ఎవరికి వారు తమకేమి పట్టన్నట్లు వ్యవహారిస్తున్నారు. మున్సిపల్‌ ఆదాయానికి గండి.. నగరంలో మరోరకం దందాకు కూడా మున్సిపల్‌ సిబ్బంది తెరతీశారు. నగరంలో సుమారుగా 3వేలకు పైగా వ్యాపార వాణిజ్య సంస్థలున్నాయి. హోటళ్లు, ఆస్పత్రులు, దుకాణాలు, కళాశాలలు ఇలాంటివన్ని కమర్షియల్‌ కిందకి వస్తాయి. అయితే వ్యాపార సంస్థలకు నీటి కనెక్షన్‌ అంటే హాఫ్‌ ఇంచ్‌కు రూ. 50వేలు, మూడో వంతు రూ. 90వేలు, ఒక్క ఇంచ్‌కు రూ. 1లక్ష 50వేల ఫీజు డిపాజిట్‌ చేయాలి. ఇంత డిపాజిట్‌ చేయకుండా ఇంటి కుళాశాయి పేరుతో కనెక్షన్‌ తీసుకొని దానిని కమర్షియల్‌గా వాడుకుంటున్నారు. దీంతో మున్సిపల్‌ ఆదాయానికి భారీగా గండి పడుతోంది. అయినా క్షేత్రస్థాయిలో ఏం జరుగుతుందో కూడా పర్యవేక్షణ చేయని స్థితిలో ఇంజనీరింగ్‌ సెక్షన్‌ అధికారులున్నారు. ఇప్పటికై నా ఉన్నతాధికారులు స్పందించి క్షేత్రస్థాయిలో ఒక్కసారి పరిశీలన చేపడితే అక్రమ నీటి కుళాయిల లెక్క బయటకు రావడంతోపాటు మున్సిపల్‌కు ఆదాయం వచ్చే అవకాశం ఉంది. కార్పొరేషన్‌ రిపోర్ట్‌ నగరంలోని వ్యాపార, వాణిజ్య సంస్థల్లో యథేచ్ఛగా ఏర్పాటు పర్యవేక్షించని అధికారులు

తెయూ(డిచ్‌పల్లి): తెలంగాణ యూనివర్సిటీ గ్రంథాలయంలో ఆన్‌లైన్‌ పరీక్షల సన్నద్ధత కోసం కంప్యూటర్‌ సౌకర్యం కల్పించాలని వర్సిటీ గిరిజన శక్తి విద్యార్థి సంఘం నాయకులు కోరారు. ఈమేరకు గురువారం వారు రాష్ట్ర గ్రంథాలయ చైర్మన్‌ డాక్టర్‌ రియాజ్‌ను కలిసి వినతిపత్రం అందజేశారు. సమస్యలను తెయూ ఇన్‌చార్జీ వీసీ, రిజిస్ట్రార్‌ దృష్టికి తీ సుకెళ్తానని చైర్మన్‌ హామీ ఇచ్చారు. నాయకులు శ్రీ ను రాథోడ్‌, సాగర్‌ నాయక్‌, రాజు, కార్తీక్‌, శ్రీహరి, నవీన్‌, చందర్‌ రాథోడ్‌, లింగస్వామి పాల్గొన్నారు. మాజీ మేయర్‌ తేనీటి విందు సాక్షి ప్రతినిధి, నిజామాబాద్‌: నిజామాబాద్‌ మాజీ మేయర్‌ ఆకుల సుజాత శ్రీశైలం గురువారం తన ఇంట్లో కాంగ్రెస్‌ ముఖ్య నాయకులకు అల్పాహారం, తేనీటి విందు ఇచ్చారు. కార్యక్రమంలో ఎమ్మెల్సీ బొమ్మ మహేష్‌కుమార్‌ గౌడ్‌, రాష్ట్ర ప్రభుత్వ సలహాదారు షబ్బీర్‌ అలీ, కాంగ్రెస్‌ ఎంపీ అభ్యర్థి జీవన్‌రెడ్డి, రాష్ట్ర ఉర్ధూ అకాడమీ చైర్మన్‌ తాహెర్‌బిన్‌ హందాన్‌, కేశ వేణు, బాడ్సి శేఖర్‌గౌడ్‌, గడుగు గంగాధర్‌, ముప్ప గంగారెడ్డి, నరాల రత్నాకర్‌, అంతిరెడ్డి రాజిరెడ్డి పాల్గొన్నారు. టీచర్లకు సౌకర్యాలు కల్పించాలి నిజామాబాద్‌అర్బన్‌: ఎన్నికల విధుల్లో పాల్గొంటున్న ఉపాధ్యాయులకు మెరుగైన సౌకర్యాలు కల్పించాలని తెలంగాణ ప్రాంత ఉపాధ్యాయ సంఘం (టీపీయుఎస్‌ ) నాయకులు కోరారు. ఈమేరకు వారు గురువారం కలెక్టరేట్‌ ఏవో ప్రశాంత్‌కు వినతిపత్రం అందజేశారు. సంఘ ప్రతినిధులు పరళి కృష్ణ్ణవేణి, బట్టు బద్రీనాథ్‌, సల్లూరు కిషన్‌, లోకిని గంగాధర్‌ లున్నారు.

నిజామాబాద్‌ రూరల్‌: ప్రతి కార్యకర్త సైనికుల్లా పని చేయాలని రూరల్‌ ఎమ్మెల్యే భూపతిరెడ్డి తెలిపారు. కంఠేశ్వర్‌ బైపాస్‌ వద్ద గల ఎమ్మెల్యే క్యాంపు కార్యా లయంలో గురువారం రూరల్‌ మండల ముఖ్య కార్యకర్తలతో ఆయన సమావేశం నిర్వహించారు. ఈసందర్భంగా పార్టీ కార్యకర్తలు అనుసరించాల్సిన వ్యూహం గురించి ఎమ్మెల్యే వివరించారు. నియోజక వర్గంలో ప్రతి బూత్‌కు ఐదుగురి సభ్యులను ఎంపిక చేసి 20 బూత్‌లపై మళ్లీ ఐదుగురిని పర్యవేక్షణ చేసేవిధంగా రూపకల్పన చేసినట్లు వివరించా రు. జిల్లాలో కాంగ్రెస్‌ పార్టీ గెలువబోతుందని ధీ మా వ్యక్తం చేశారు. కిసాన్‌ కేత్‌ జిల్లా అధ్యక్ష్యుడు ముప్ప గంగారెడ్డి, పీసీసీ డెలికేట్‌ చంద్రశేఖర్‌గౌడ్‌, నాయకులు గడీల రాములు, భాస్కర్‌రెడ్డి, కంచెట్టి గంగాధర్‌, సాయారెడ్డి, అగ్గు బోజన్న, కుమార్‌రెడ్డి, ఎల్లయ్య, సాయారెడ్డి, అమృతాపూర్‌ గంగాధర్‌, నవీన్‌ గౌడ్‌, చిన్నరెడ్డి, బాల్‌రాజ్‌, రవి పాల్గొన్నారు. నిజామాబాద్‌ రూరల్‌ మండలంలోని సారంగాపూర్‌ గ్రామంలో రూరల్‌ ఎమ్మెల్యే భూపతిరెడ్డి ప్రచారం నిర్వహించారు. పార్టీ అభ్యర్ధి జీవన్‌రెడ్డిని గెలిపించాలని ఆయన ప్రజలను కోరారు. నాయకులు నగేష్‌, జిలాని, శ్రీనివాస్‌, జుబేర్‌ తదితరులు పాల్గొన్నారు.

గుడితండాలో వైద్యశిబిరం మోపాల్‌: మండలంలోని గుడి తండాలో గురువారం ముదక్‌పల్లి ప్రాథమిక ఆరోగ్య కేంద్రం సహకారంతో సూర్య ఆరోగ్య సంస్థ ఆధ్వర్యంలో ఉచిత వైద్య శిబిరం నిర్వహించారు. వైద్యులు రోగులను పరీక్షించి, మందులు పంపిణీ చేశారు. వైద్యులు అలేఖ్య, సంతోష్‌ కుమార్‌, నజీమ్‌ అహ్మద్‌ ఖాన్‌, శ్రీకాంత్‌, ఆరోగ్య సంస్థ ప్రతినిధులు పాల్గొన్నారు. నూతన కార్యవర్గం ఎన్నిక సిరికొండ: మండల కేంద్రంలో గురువారం మండల దివ్యాంగుల యూనియన్‌ను ఏర్పాటు చేశారు. నూతన కార్యవర్గాన్ని ఏకగ్రీవంగా ఎన్నుకున్నారు. అధ్యక్షుడిగా రొండ్ల శ్రీనివాస్‌, ఉపాధ్యక్షులుగా రాజశ్రీ, కార్యదర్శిగా లింగం, సహయ కా ర్యదర్శిగా విజయ్‌, కోశాధికారిగా బోయిడి మంజుల ఎన్నికయ్యారు. సభ్యులు పోతన్న, అరుణజ్యోతి, సఫియబేగం, అంబర్‌లాల్‌,ఆంజనేయులు,ప్రశాంత్‌,అమర్‌నాథ్‌ ఉన్నారు. చలివేంద్రం ప్రారంభం నిజామాబాద్‌నాగారం: నగరంలోని రెడ్‌క్రాస్‌ సొసైటీ ఆవరణలో గురువారం చలివేంద్రాన్ని రెడ్‌క్రాస్‌ చైర్మన్‌ బుస్సా ఆంజనేయులు ప్రారంభించారు. సభ్యులు తోట రాజశేఖర్‌, కరిపే రవీందర్‌, అరుణ్‌బాబు, సూర్య నారాయణ, వెంకట కృష్ణ, సోలొమన్‌, శ్రీనివాస్‌రావు, హన్మంతురావు, రామకృష్ణ పాల్గొన్నారు ఘనంగా కళాశాల వార్షికోత్సవం నిజామాబాద్‌అర్బన్‌: నగరంలోని న్యూ అంబేడ్కర్‌ భవన్‌లో గురువారం వాగ్దేవి క ళాశాల వార్షికోత్సవం ఘనంగా నిర్వహించారు. కరస్పాండెంట్‌ సుజన్‌రెడ్డి, ప్రిన్సిపాల్‌ వెంకట్‌రెడ్డి విద్యార్థులనుద్దేశించి మాట్లాడారు. అనంతరం విద్యార్థులు ఆటపాటలతో ఉత్సాహంగా గడిపారు. సిబ్బంది వేణుగోపాల్‌, రవీందర్‌, దత్తు పాల్గొన్నారు. 12న ప్రతిభ పురస్కారాల ప్రదానం నిజామాబాద్‌నాగారం: ఇటీవల వెలువడిన ఎస్సెస్సీ, ఇంటర్‌ ఫలితాల్లో ఉత్తమ ప్రతిభ కనబర్చిన గంగపుత్ర (గూండ్ల/ బెస్త) విద్యార్థులకు ఈనెల 12న ప్రతిభ పురస్కారాలు అందజేయనున్నట్లు సంఘం జిల్లా అధ్యక్షుడు నీలిరాంచందర్‌ ఒక ప్రకటనలో పేర్కొన్నారు. ఎస్సెస్సీలో 9 జీపీఏ పైన వచ్చినవారు, ఇంటర్‌లో 900 మార్కులపైగా సాధించిన విద్యార్థులు అర్హులన్నారు. ఆసక్తిగల వారు 94905 11114ను సంప్రదించాలని లేదా డా నీలి రామచందర్‌, కవిత పిల్లల ఆస్పత్రిలో ఈనెల 9లోపు దరఖాస్తులు అందజేయాలన్నారు. నూతన వేతన ఒప్పందం చేయాలి ఖలీల్‌వాడి: బీడీ కార్మికులందరికీ పెరిగిన ధరలకు అనుగుణంగా నూతన వేతన ఒప్పందం చేసి, అమలు చేయాలని తెలంగాణ ప్రగతిశీల బీడీ వర్కర్స్‌ యూనియన్‌ (ఐఎఫ్‌టీయూ) నాయకులు డిమాండ్‌ చేశారు. ఈమేరకు వారు గురువారం బీడీ కంపెనీ యజమానుల సంఘం అధ్యక్షుడు హెచ్‌పీ ప్రకాష్‌ ఉపాధ్యాయ, ప్రధాన కార్యదర్శి ధర్మేందర్‌ గాంధీలకు వినతిపత్రం అందించారు. యూనియన్‌ రాష్ట్ర అధ్యక్షులు వనమాల కృష్ణ, నరేందర్‌, రాజన్న, రాజేశ్వర్‌, వెంకన్న, రాంప్రసాద్‌ పాల్గొన్నారు.

ఖలీల్‌వాడి: రైతులకు ఆగష్టు 15 లోపే రుణమాఫీ చేస్తామని కాంగ్రెస్‌ ఎంపీ అభ్యర్థి జీవన్‌ రెడ్డి తెలిపారు. జిల్లా కేంద్రంలోని విజయ్‌ కిసాన్‌ మున్నూరుకాపు సంఘ భవనంలో గురువారం ఆయన మున్నురుకాపు సభ్యులతో సమావేశం నిర్వహించారు. ఈసందర్భంగా జీవన్‌రెడ్డి మాట్లాడుతూ.. 2004లో ఉన్న మద్దతు ధర రూ.450 నుంచి 2014 వరకు రూ. 1350కి మూడు రేట్లు పెంచామన్నారు. బీజేపీ పదేళ్ల పాలన కాలంలో రూ.1350 నుంచి రూ. 2200 మాత్రమే కనీసం రెట్టింపు కూడా చేయలేదన్నారు. రైతుల ఆదాయం రెట్టింపు చేస్తామని చెప్పిన మోదీ, ఎరువుల ధరలు పెంచి పెట్టుబడి రెట్టింపు చేశారన్నారు. పెట్రోల్‌ డీజిల్‌ ధరలు పెరగడంతో రైతులపై తీవ్ర భారం పడుతుందన్నారు. ఎంపీగా కవిత గెలిచిన తర్వాత ప్రైవేట్‌ రంగంలో నడుస్తున్న చక్కర కర్మాగాలను పూర్తిగా మూసివేశారన్నారు. ప్రతి ఒక్కరూ తనకు మద్దతు తెలిపి ఎంపీగా గెలిపించాలని కోరారు. అనంతరం ఎమ్మెల్సీ మహేష్‌ కుమార్‌ గౌడ్‌ మాట్లాడుతూ.. బీసీలు ఐక్యంగా ఉండాలని, బీజేపీ అధికారంలోకి వస్తే బీసీల రిజర్వేషన్లు తొలగించే ప్రమాదం ఉందన్నారు. రాష్ట్ర ప్రభుత్వ ప్రధాన సలహాదారు షబ్బీర్‌ అలీ మాట్లాడుతూ.. మోదీ నల్ల చట్టాలు తీసుకువచ్చి రైతులను ఇబ్బందులకు గురి చేశారని, ఐక్యంగా రైతులందరూ పోరాటం చేస్తే వెనక్కి తగ్గారని గుర్తు చేశారు. డీసీసీ అధ్యక్షులు, రాష్ట్ర కోఆపరేటివ్‌ చైర్మన్‌ మానాల మోహన్‌రెడ్డి, నగర కాంగ్రెస్‌ అధ్యక్షుడు కేశవేణు, కాంగ్రెస్‌ నాయకులు పాల్గొన్నారు. క్వింటాల్‌కు రూ.500 బోనస్‌ అందిస్తాం కాంగ్రెస్‌ ఎంపీ అభ్యర్థి జీవన్‌రెడ్డి